Asturies avérase a los 90.000 desemplegaos tres sumar 3.277 paraos más nel mes de payares

El númberu total de desemplegaos n’Asturies algamó en payares la cifra récor de 88.853 paraos, superando les cifres males de febreru. La razón ye una medra del 3,83 por cientu con respeuto al mes anterior, según datos del ministeriu.
 
Ello supón que 3.277 persones perdieron el so puestu de trabayu en payares, lo qu’avera’l númberu total de paraos nel país cerca de la cifra de 90.000 desemplegaos. Si miramos los términos interañales, el paru n’Asturies medró un 11,56 por cientu, lo que supón 9.206 paraos más qu’en payares del 2010.
 
No que respeuta a los datos estatales, el númberu de paraos rexistraos nes oficines de los servicios públicos d’emplegu situáronse al finar el mes en 4.420.462 persones tres xubir nel mes en 59.536 desemplegaos, un 1,37 por cientu más. Tolos territorios vieron como medraron les cifres de paru, menos Melilla (-7,56 por cientu) y la Comunidad de Madrid (-0,81 por cientu), situándose nel polu opuestu Illes Balears (11,96 por cientu), La Rioja (5,5 por cientu) y Galicia (4,66 por cientu). En términos añales, nel conxuntu del Estáu hai 310.168 paraos más, lo que supón un xuba del 7,55 por cientu. Los territorios más afectaos son Ceuta (23,24 por cientu), La Rioja (12,82 por cientu) y Cantabria (12,53 por cientu).