Grupos medioambientales critiquen la “falta de polítiques de conservación de la fauna salvaxe” de FAC

L’aprobamientu de la matanza de 240 cuervos cagalones llevó a dellos grupos ecoloxistes a acusar al Gobiernu de movese presionáu por coleutivos de pescadores. Critiquen “la falta de polítiques de conservación de la fauna salvaxe”.
 
Doce grupos medioambientales firmaron un comunicáu contra esta decisión que va llevar a la muerte a diez exemplares más de cuervos cagalones que l’añu pasáu. “Nun ye aceptable que’l Foro, lo mesmo que fixo’l Gobiernu anterior, apruebe la matanza de mas de 240 exemplares de cuervos cagalones n’agües continentales –munchos más muerren al nun ser recoyíos–” pa, na opinión de los ecoloxistes, “agradar a los pescadores, que son los únicos que reclamen da manera insistente la matanza d’una especie salvaxe pa qu’ellos pesquen más”.
 
El cuervu cagalón ye una especie non cinexética que s’alimenta de salmónidos y a la que los pescadores acusen d’acabar col salmón, una especie que ta viviendo un retrocesu importante. Por esti motivu, dende 2005, el Gobiernu ta permitiendo la caza d’estes aves cola inteción de controlar el so númberu. Asina, la Conseyería d’Agroganadería y Recursos Autóctonos dio lluz verde a la matanza d’un total de 240 cuervos cagalones na campaña próxima: 90 nel Nalón, 40 nel Caudal, 50 nel Narcea, 30 nel Seya, 20 nel Cares, 5 nel Esva y 5 nel Navia. Los grupos mediambientales critiquen que nun se faigan públicos “los criterios que s’utilicen pa determinar esa cantidá” y dicen desconocer “de dónde salen los númberos propuestos”.
 
“Esta práutica d’aprobar la caza d’especies por presiones ye una demostración más de la falta de polítiques de conservación de la fauna salvaxe por parte del Principáu, dirixida a contentar sectores en vez de defender los valores naturales”, apunten los ecoloxistes, que recuerden que les mesmes midíes adoptaes n’años anteriores nun llevaron “a un aumento de la pesca de pexes nin a una disminución del númberu d’aves a mediu plazu, que permanez estable nos sos 14 años últimos, como reconoció en delles ocasiones el Principáu”. D’igual forma, apunten que los salmónidos son namái una pequeña parte de la dieta del cuervu cagalón y que’l so descensu débese a la sobrepesca y la contaminaciónd de los ríos.
 
Por último, les 12 formaciones firmantes (Coordinadora Ecoloxista d’Asturies, Coordinadora Ornitoloxica d’Asturies, Asociación para la Defensa Jurídica del Medio Ambiente Ulex, Colectivo Ecologista de Avilés, Asociación Ereba, Ecología y Patrimonio, Asociación Salvemos los Territorios del Bajo Navia-Salternavia, Grupu d’Ornitoloxia Mavea, Plataforma para la Defensa de la Coordillera Cantábrica, Asociación Medioambiental La Cirigueña de Morcín, Asociación Molín de Adela de Güeria-Ayer, Instituto para la Calidad y Educación Ambiental y SOS Cuideiru) reclamen la necesidá d’obtener más datos sobre la dieta de los cuervos cagalones pa “evaluar de la manera más precisa’l so impautu sobre les poblaciones de pexes” y, si llega a ser necesario, tomar midíes de control que “serán contemplaes siempre dende’l diálogu y con un fundamentu científicu; non poles presiones d’un coleutivu interesáu, como ye’l de pescadores”.