Llangres presenta'l so discu en La Felguera

Llangres vuelven a casa  pa presentar el so últimu discu, "Entá". El grupu que tien el so orixe na cuenca'l Nalón -d'ehí'l so nome- va actuar en La Felguera esti sábadu día 7. Esti concirertu va xuntase con otros de presentación de cd que Llangres tien pensao facer per más llugares de la xeografía asturiana.
 
Llangres ye un grupu qu’adulces foi quien a algamar una estabilidá y continuidá na so carrera, daqué que nun ye xera fácil. De mano'l grupu apostó claramente per una llinia folk de corte atlánticu qu’afitaron ya nel so primer discu, “Stura” en 2002. Más alantre, ya nel 2005, espublicen un discu nuevu, “Esnalar”, nel qu'apaez una de les señes d’identidá más importantes de Llangres, l’apueste polos temes cantaos, per aciu de la incorporación a la banda de la cantante Esther Fonseca. Esta incorporación lleva a que’l grupu asuma nel so soníu dello toques pop nos temes cantaos, averando d’esta manera’l folk de Llangres a un estilu más comercial. Esta llínia afitóse nel discu que presenten el sábadu en La Felguera, que lleva nestiendes dende la seronda, y que ya tocaba presentar na zona onde nació Llangres. 

El conciertu va ser a les 20:15 hores nel Nuevu Teatru de La felguera, actuación na que'l grupu va xubir al escenariu cola formación nueva, que suma nada más y nada menos qu'a ocho componentes, ente los que tán los veteranos del la banda, Dolfu Rodríguez, Viriu Fernández, Borja Baragaño, Yago Prado y Esther Fonseca, reciente ganadora del premiu al meyor cantar n'asturianu de la SGAE. A esta base folki súmase'l baxu de Pablo Álvarez, la batería de Javier González y los teclaos del premiáu Alfredo González, too ello col sofitu técnicu de Pablo Lato, productor del discu.

 
Llangres ta preparando más presentaciones per más llugares, Uviéu, occidente d'Asturies, de les que van dir dando anunciando d'equí a poco.