Condenáu a diez meses de cárcel l'independentista asturianu que tentó de colocar un artefautu esplosivu en L'Infiestu

|

L'Audiencia Nacional condenó a diez meses de cárcel por un delitu d'estragos al independentista asturianu Fernando González Rodríguez, al considerar probáu que'l 13 de setiembre del 2005 tentó de colocar dos artefautos esplosivos xunto a la sede del PSOE de L'Infiestu.
 
   Nuna sentencia fecha pública güei, la Estaya Cuarta de la Sala de lo Penal establez que Fernando González Rodríguez, de 34 años, preparó una garrafa de gasolina con dos aerosoles y dos cilindros de pólvora y los treslladó nel so vehículu hasta la citada llocalidá pa colocalos a la entrada de la sede socialista.
 
   Sicasí, nun pudo cometer l'aición porque enantes de colocar los artefautos detuviéronlu dos axentes de Policía a los que llegó a alvertir que tenía "un bichu prendíu nel coche" que diba españar.
 
NUN HAI FINALIDÁ TERRORISTA
 
   La sentencia, de la que foi ponente la xueza Carmen Paloma González, destaca'l 'abrumador' material probatoriu que xustifica la condena del independentista asturianu, anque rebaxa enforma'l pidimientu d'ocho años de prisión solicitáu pol fiscal, Miguel Ángel Carballo, al nun alvertir finalidá terrorista y aplicar el tipu penal mas suave.
 
   Argumenta esta decisión en que l'acusáu nun utilizó "medios de gran poder destructivu capaces de causar destrucción de determinaes instalaciones", nin causó "un peligru patente pa la vida o seguridá de les persones", requisitos que recueye'l Códigu Penal pa la modalidá más grave del delitu d'estregos.
 
   En cuanto a la finalidá de l'aición, el tribunal destaca que González Rodríguez, "enllenu de rabia", trató d'atacar la sede del PSOE de L'Infiestu como señal de "refugu" a les detenciones ordenaes unos díes enantes pola Delegación del Gobiernu con motivu d'una concentración de "estrema" izquierda que se celebró en Cangues d'Onís, en respuesta a otru actu covocáu pola organización Democracia Nacional.
 
   El tribunal esclúi la intención terrorista de los fechos y los llenda a un actu de "revanchismu".
 
ENTENDÍA'L CASTELLÁN
 
   El tribunal xustifica la decisión de la so presidenta, Ángela Murillo, de nun permitir al acusáu espresase en llingua asturiana argumentadno que la so solicitú de contar con un intérprete "nun tenía razón de ser en problemes d'entendimientu o compresión del castellán, sinón sólo, en nun querer usalu".
 
   D'esta manera, considera que González Rodríguez nun sufrió indefensión nos términos establecíos pol Tribunal Constitucional, que sólo ampara los casos en que se "torga una parte del exerciciu del derechu de defensa privando o llendando la so capacidá d'exercitar bien la so facultá d'alegar y xustificar los sos derechos y intereses que se-y reconocen".
 
   Na primer xornada del xuiciu, que se celebró'l pasáu 12 de xineru, la xueza Murillo torgó al mozu que s'esresare n'asturianu, al recordar que nun ye "una llingua cooficial". D'igual manera, alegó qu'ella, nacida n'Estremadura, "tamién podía facelo en castúo", pero entós tampoco la entenderíen.

Contador Estadistiques