El Ministeriu de Cultura anicia los trabayos de restauración de la catedral d’Uviéu

La restauración de la catedral d’Uviéu yá ta en marcha. La sacristía, la zona trasera del altar y la capiella Cuadonga van beneficiase d’esta actuación con una inversión de 425.000 euros y un plazu d’execución de seis meses.
 
Según información ministerial, la intervención ta faciéndola l’Instituto del Patrimonio Cultural de España (IPCE) nel marcu de lo establecío nel 1996 pol Plan direutor del conxuntu catedraliciu. Ún de los espacios nos que se va trabayar ye la capiella Cuadonga, que presenta numberosos daños nes fábriques pétrees, asina como humedaes, lo qu’obliga a facer una actuación integral nesti espaciu. Tamién va sustituyise la puerta esterior de madera por otra más fuerte que favorecerá la entrada de lluz natural y va iguase’l dintel petreu del güecu altomedieval de conexón cola cripta de Santa Leocadia.
 
Problemes por humedá tamién presenten los muros esteriores de cinco capielles asitiaes na parte trasera del altar qu’afeuten a los sos retablos. La intervención nestos espacios persigue llograr la estanqueidá de les fábriques y inclúi la renovación de los ventanales dañaos. Por último, anque iguáronse en reformes anteriores la mayor parte de les cubiertes de la catedral, queden tovía pendientes dalgunes zones como la sacristía, que tien humedaes nel so interior, de manera especial nel frescu de l’Asunción, obra de Francisco Martínez Bustamante, que decora la bóveda del tambor.