Darréu y el Bloque de la Mocedá Asturianista entamen una xornada contra la violencia de xéneru

Esti vienres, coincidiendo col Día Internacional contra la Violencia de Xéneru, Darréu y el Bloque de la Mocedá Asturianista van entamar una xornada n’Uviéu pa concienciar sobre esti problema. CSI Mocedá sofita esta iniciativa.
 
La xornada tien el lema ‘Mocedá por una Asturies llibre de terrorismu de xéneru’ y va dividise en dos actividaes alredor d'esta problemática, “un fenómenu qu'entendemos dende dambes organizaciones qu'hai que combatir hasta'l so desaniciu”. El primer eventu del día va celebrase en Llamaquique, a les 18 hores. Trátase d’una concentración delantre de la estación de tren.
 
De siguío, pa les 18.30 hores, ta prevista una charra-alderique nel llocal de la Corriente Sindical d’Izquierda (CSI) sobre la violencia de xéneru abierta a la participación de tol mundu col oxetivu de construyir opiniones y dar pasos na llucha “contra'l terrorismu de xéneru y la sociedá patriarcal capitalista na que vivimos, onde entá esisten abondos prexuicios y discriminaciones en función del sexu de la persona". Dende les dos organizaciones nacionalistes conviden a tola mocedá asturiano a tomar parte nes actividaes previstes pa esti vienres.