Francisco Álvarez-Cascos ve “probable” que la oposición presente una moción de censura

El presidente d’Asturies señaló qu’una moción de censura “ye l’escenariu” más “probable” polos comportamientos que ta viendo de la oposición na Xunta Xeneral. “Tolos grupos punxéronse d’alcuerdu pa bloquiar a Foro”, afirmó.   
 
"Esi escenariu políticu de collaboración contra’l Gobiernu de Foro nun pue sostenese nel tiempu; o cambia l’actitú de dalgún d’ellos o formalícenla cola presentación d’una moción de censura, que ye l’escenariu que me paez más probable a la vista de los sos comportamientos últimos na Xunta Xeneral", esplicó Francisco Álvarez-Cascos nuna entrevista concedida a la Cadena Cope.  El llíder de FAC tamién faló del cambiu llexislativu que defenden los grupos de la oposición pa frenar el plan de contención del Gobiernu y señaló que "nun ye serio" que se pretenda camudar una norma que venía funcionando dende hai años, y amás que pretendan facelo con carauter retroactivu. Nesi sen, alvirtió que’l so Gobiernu va emplegar tolos "resortes llegales" pa defendese.
 
"Nun pue ser qu’en toda España s’impongan los recortes presupuestarios y equí s’intente bloquiar a un Gobiernu que trata de cumplir col mandáu constitucional", manifestó’l presidente del país. Mentes, sobre la ellaboración de los presupuestos pal 2012, apuntó que siguen a la espera de tener una información por parte del Gobiernu estatal d’unes previsiones series. Nesi momentu tendrán que decidir si faen unes cuentes nueves, que ye "la opción más deseada", o si prorroguen les actuales. En too casu, Álvarez-Cacos afirmó que la intención de FAC ye dialogar con toles fuercies parllamentarias. "Nós tenemos vocación de diálogu, pero tolos grupos punxéronse d’alcuerdu pa bloquiar a Foro".