La Fundación Belenos dedica’l XII Seminariu d’Estudios Asturianos a les brañes y la cultura pastoril n'Asturies

‘Les Brañes. Un averamientu a la cultura pastoril n’Asturies’ ye la temática sobre la que va xirar el XII Seminariu d’Estudios Asturianos de La Fundación Belenos. Ésti va tener llugar en La Puela los díes 26 y 27 de payares.
 
L’actividá va principiar el sábado 26 a les 10.30 hores cola presentación y inauguración del Seminariu, a lo que siguirá una charra del antropólogu y profesor de la UNED, Adolfo García Martínez, sobre ‘Las brañas n’Asturias. La trashumancia interior y la trashumancia de los vaqueiros d’alzada’. Xulio Concepción Suárez, filólogu y profesor de Secundaria, va ser el siguiente n’invervenir, a les 12.30 hores, cola ponencia entitulada ‘Siempre de camín ente la casa y la cabana’. Pa les 14.30 hores ta prevista la xinta.
 
Pela tarde, a les 17 hores, el turnu va ser pal profesor de Filosofía Gonzalo Barrena Díez, que va tratar de los ‘Habitantes de la peñe. Pastores y mayadas en los Picos d’Europa’, pa depués dar pasu, a les 18.30 hores, al etnógrafu y miembru de la Fundación Belenos, Alberto Álvarez Peña, que va falar de ‘«El mal güeyu, l’aigla y la tona». El mundu de les mentalidaes na cultura les brañes’. La cena va celebrase a les 21.30 hores y, a les 23.30 hores, va tener llugar un filandón nel Café Centro.
 
El domingu, los participantes nel Seminariu van poder visitar la braña d’Allande a les 11.30 hores, onde va tratase en conceyu abiertu un alderique sobre’l tema ‘Les brañes güei: ¿El desaniciu d’una cultura milenaria?’. Tres esti actu, a les 14.30 hores, va pesllase’l programa d’estes xornaes con una xinta.
 
La inscripción pa participar nestes actividaes entamaes pola Fundación Belenos en collaboración con La Nueva Allandesa, el Conceyu d’Allande y la Conseyería de Cultura y Deporte, ye de 40 euros. Amás, tolos participantes tienen la opción d’agospiase en rexime de pensión completa en La Nueva Allandesa por 60 euros por persona. Los interesaos n’acudir al Seminariu d’Estudios Asturianos han d’ingresar les perres de la inscripción nel númberu de cuenta 2048 0000 26 0340123307 pa formalizar la matrícula. Pa más información, pueden ponese en contautu cola organización nos teléfonos 985.24.48.11 y 616.242.319, o nes direiciones de corréu electrónicu seminariudebelenos@gmail.com y fundacionbelenos@gmail.com.