Andecha Astur cataloga d'inaceptable “el silenciu cómpliz del ‘Principado’” tres la decisión de la Xunta Eleutoral de torgar la presencia de papeletes n’asturianu nos colexos eleutorales. Considera que ye un bon momentu pa dar apoyu al idioma.
La organización nacionalista quixo agradecer públicamente mediante un comunicáu “les múltiples manifestaciones de solidaridá recibíes, tanto de particulares como d’otres organizaciones sociales, partíos políticos, sindicatos, asociaciones culturales..., agradeciendo especialmente’l sofitu de l’Academia de la Llingua Asturiana”. Por contra, amosó’l so refugu a la postura del Gobiernu al entender que la negativa de la Xunta Eleutoral a la distribución de papeletes n’asturianu nos colexos eleutoral yera una bona oportunidá pal Executivu pa “traducir en fechos la so proclamada sensibilidá democrática y el respetu y consideración a la llingua asturiana”.
Pese a esta situación discriminatoria que vive per enésima ocasión la llingua del país, Andecha Astur considera “qu’algamar otra vuelta la validez del votu n’asturianu supón un nuevu avance na normalización democrática n’Asturies, cola oficialidá comu oxetivu imprescindible pa garantizar los drechos llingüísticos del pueblu asturianu”. Nesi sen, recuerda que toles persones interesaes en votar a la formación nacionalista cola papeleta n’asturianu pueden recoyela nes sedes de la organización.
Comentarios
Los qu’apostemos siempres por un nacionalismu asturianu DEMOCRATICU nun salimos del abluque al ver la llixereza cola que se traten estos temes. Ye persabío que les persones que presenten les sigles d’Andecha Astur a éstes y otres elleiciones tan usurpandoles al conxuntu de los militantes, y el que nun haya denuncies pol momento nun quier dicir qu’estes sigles nun ten secuestraes. El nacionalismu asturianu ta engocháu dende fai años por un personaxe ensin nenguna clas d’escrúpulos democráticos, que necesita la coartada nacionalista pa tapecer les sos múltiples negocios a la solombra del poder, por nun falar de les sos milenta perreríes empobinaes a un únicu finxu: vivir yo bien a cambéu de torgar a toa costa cualesquier intentu de creación d’una alternativa nacionalista seria n’Asturies. Llamentable que tanto l’ALLA como la prensa dixital asturianista entren al trapu que-yos pon delantre’l personaxe en custión. Sólo son defendibles papeletes eleutorales n’asturianu si les sigles que les caltienen nun tan engochaes xurídica y políticamente por actuaciones illexítimes ya impresentables d’unos personaxes qu’una vez más vienen a poner el trapu pa despistar.
Paezme mui atoldáu esti comentariu qu'atopé na rede:
Les sigles "Andecha Astur" son una vergoña pa tolos asturianos, y más pa los nacionalistes asturianos. Los qu´afalemos la Xuntanza nel so día yá sabemos bien por qué esti grupúsculu -y tolos sos derivaos, como Conceyu Abiertu, CUPX, N´Ast, Democracy for Asturies, etc.- estrozó cualisquier posibilidá seria d´esposixe del nacionalismu asturianu. Son quitacolumnistes. L´ALLA y la prensa dixital ta siguiendo-yos el xuegu.
Y esi señor o esa familia empobinó ataques al intentu más seriu d´axuntar a tol nacionalismu asturianu. Semó cizaña cuantu pudo, pero hai que tener presente (pa completar lo mentao arriba) que tien siguimientu n´estayes de les otres formaciones asturianistes y nacionaliegues. Van sacar 100 votos, sí, una cantidá ridícula, pero tien ramales na UNA, nel Bloque, el PAS...y los medios disxitales, conformando lo qu´un blogue vien nomando "la izquierda del bable y la gaita". Del blogue d´El Gorrumbu dexo esti comentariu:
![](http://asturies.gugara.com/blog/quasimodo/111118152957300px-Vladimir_Lenin_and_Joseph_Stalin,_1919.jpg)
Aquellos combativos de lo social, ¿úlos?.
Nun va tanto énte l'intentu arrogante d'un bon piñu xente por tratar d'algamar una xuntanza amplia pa les pasaes eleiciones autonómiques, otru grupu xente venceyao a la izquierda radical fartucábase de descalificar a los primeros, ridiculizando la importancia del tema identitariu na reivindicación nacionalista y insistiendo too darréu nuna contraposición falsa ente lo identitario y lo social dando a esto último un llugar cimeru y indiscutible. D'otru llau, hebo hasta quien nun tuvo pelos na llingua pa mostrar la so desconfianza, rocea y hasta simple refugu pol nacionalismu acusándolu de ser tarecu de la estrema drecha.
Fixeron bien el so llabor de furar los cimientos de lo que s'intentaba llevantar y yá sabemos toos cómo acabó aquello. Col enésimu fracasu eleutoral y cola mayor parte d'esi nacionalismu camudáu nuna izquierda del bable y la gaita xirando alrodiu de IX y en resultancia tamién del planeta políticu sobre'l que xira esta coalición que nun ye otru que'l PSOE.
Pero lo qu'anguaño choca muncho ye'l silenciu en que se somorguiaron aquellos combativos revolucionarios de "lo social sí y lo nacional refugaya". Talo paez que se sumieren como por encantu. Nun asomen niundes, nin sopelexen aquellos discursos que tán enfotaos enarbolaben como bandera apocayá. ¿Y ello por qué?. Pues cenciellamente porque'l llabor que teníen que facer llevárenlu a cabu con ésitu. Consiguieren qu'esbarrumbare la xuntanza propuesta y too arreglao.
Y too ello nun fai más que danos la razón a los que denunciemos que cuantayá qu'entraron submarinos de la izquierda radical estatal nel nacionalimu asturianu d'izquierda p'abellugase nél y tratar d'utilizalu como una caxa de resonancia amañosa pa les sos reivindicaciones. Hai que reconocer que consiguieron los sos oxetivos dafechu y anguaño una parte seique mayoritaria d'esi nacionalismu d'izquierda nun ye otra cosa que una izquierda bablegaiteril y inservible pa llevar alantre n'Asturies un auténticu proyeutu nacional.