Lluis Portal gana’l Fuertes Acevedo d’ensayu con un trabayu sobre l’escultor Cipriano Folgueras

L’escritor y periodista Lluis Portal llevóse’l Premiu Fuertes Acevedo d’ensayu n'asturianu gracies al so trabayu ‘Cipriano Folgueras, una gloria d’Asturies’. El gallardón, concedíu pola Conceyalía de Cultura y Deporte, ta dotáu con 7.000 euros.
 
El xuráu que falló esta edición del Máximo Fuertes Acevedo, presidíu por Alfredo Álvarez Menéndez, direutor xeneral de Política Llingüística, tuvo formáu polos escritores Vicente García Oliva, ganador de la edición anterior del premiu; Xosé Anxelu Gutiérrez Morán, doctor en Bioloxía y investigador del Centru Oceanográficu de Xixón; y Vital d'Andrés Díaz. L’acta del premiu destacó "el caráuter biográficu del ensayu y el trabayu de recuperación de la figura y la obra d'un escultor brillante olvidáu pola sociedá asturiana".
 
"L'autor, con un bon dominiu críticu y estéticu, conduz al ambiente del mundu de la escultura española d'últimos del sieglu XIX y primeros del XX", consideren los miembros del xuráu, que ponen de relieve amás "la implicación emocional del autor cola figura del escultor". Hai que destacar que la so decisión foi por unanimidá.
 
Lluis Portal Hevia (Villaviciosa, 1964) ye periodista y como tal collabora con distintos medios de comunicación, como La Voz de Asturias, Les Noticies, Asturias Deportivo o Maliayo, ente otros. Como escritor tocó distitnos xéneros lliterarios: el cuentu, la novela xuvenil, el teatru, la poesía o la biografía. De la mesma manera, destaca na investigación etnográfica.