Galicia reconoz que’l territoriu onde’l Fapas capturó a una águila pescadora pertenez a Asturies

De 6.000 a 600 euros. Galicia rebaxó la cantidá de la multa que quier imponer al Fapas por capturar una águila pescadora en terrén asturianu. El Gobiernu vecín reconoz que los ecoloxistes garraron l’ave n’Asturies, anque diz qu’operaron dende Galicia.
 
Guardes de la Xunta de Galicia denunciaron a la entidá conservacionista y sancionáronla con una multa bien grave de 6.000 euros por capturar una águila pescadora na parte asturiana correspondiente a la Ría del Eo. Agora, la resolución nueva de la Xunta rebaxa la sanción, anque caltién pa xustificala que "parte del operativu fechu pol Fapas pa la captura de l’águila realizóse dende territoriu gallegu". En concreto, apunta a la presencia de persones que dende un observatoriu ornitolóxicu de Lugo presenciaron la captura.
 
En xunetu, el Fondu pa la Proteición de los Animales Salvaxes (Fapas) denunció la intención de Galicia de querer anexonar 100 hectarees d’Asturies cuando recibió la propuesta de sanción al reclamar les autoridaes gallegues qu’esa zona yera propia. Pa tratar de demostralo, presentaron un documentu cartográficu desvinculáu del Ministeriu de Fomentu y del Instituto Nacional de Cartografía, que sí consideren esos terrenos asturianos, como se reflexa nos mapes oficiales. Agora, la Xunta da marcha atrás nesta reivindicación.  
 
"Too paez indicar que los funcionarios del Serviciu Xurídicu de la Xunta consideren illegal que ciudadanos d'otra comunidá autónoma puedan observar aves dende'l so territoriu", llamenta'l Fapas. En concreto, asegura que'l pliegu de cargos per mediu del documentu gráficu fai referencia a que "pue observase cómo se realicen fotografíes y se coordina l'aición col personal asitiáu na embarcación", qu'en too momentu taba n'Asturies. A lo último, indica que la Xunta decidió rebaxar la sanción de la multa pese a que reconoz na instrucción del procedimientu sancionador que'l Fapas entregó documentación con referencies esactes del llugar de captura, que según la cartografía del Signa, Sistema d'Información Xeográfica Nacional d'España, "ye claramente Asturies".
 
Por ello, el Fapas presentó recursu d'alzada ante'l Gobiernu de Galicia, polo que considera "una clara violación d'un derechu fundamental", como ye'l de trabayar pol caltenimientu de la naturaleza n'Asturies, onde "l'asociación tien tolos permisos y autorizaciones correspondientes pa llevar a cabu'l trabayu de caltenimientu de l’águila pescadora".