Principien n’Uviéu les XXX Xornaes Internacionales d’Estudiu

A les 16.30 hores d’esti martes va tener llugar l’entamu de les XXX Xornaes Internacionales d’Estudiu de l’Academia de la Llingua Asturiana (ALLA). Dientru d’elles va facese un Conceyu Internacional de Toponimia y Antroponimia Asturiana.
 
“El formatu ye’l de tolos años”, señala Ana María Cano, presidenta de l’ALLA, “con una riestra de ponencies y comunicaciones y cola presencia d’especialistes de distintes universidaes españoles y europees” nes trés xornaes nes que se divide esta iniciativa. La Facultá de Filosofía y Lletres va acoyer toles actividaes que “espero y aguardo que seyan un ésitu, como pasó coles otres ediciones”, apunta Cano.
 
L’encargáu d’abrir les xornaes, tres l’entamu, va ser Xavier Terrado Pablo (Universitat de Lleida) con una ponencia sobre’l ‘Léxico románico arcaico en la toponimia catalana y asturiana’. Martín Sevilla, Xabiel Fernández García, Francisco Javier Redondas Maseda, Pablo Suárez García, Xosé Lluis García Arias y Alda Rossebastiano (Università degli Studi di Torino) tamién van intervenir nesti primer día del Conceyu que va pesllase cola presentación, a partir de les 20.15 hores, de les revistes ‘Lletres asturianes 105’ (edición dixital) y ‘Ciencies. Cartafueyos Asturianos de Ciencia y Teunoloxía 1’ (revista dixital).
 
Pa la segunda xornada, los ponentes previstos son Emili Casanova (Universitat de València), Fernando Bello Garnelo, Iván Huerga Antuña, Jesús García y García, Inaciu Galán y González, Próspero Morán, Héctor García Gil y Carmen García Alayón (Universidad de La Laguna), que va averar a los presentes los rasgos particulares de la toponimia de Canarias. Por último, a les 20 hores, va presentase’l llibru ‘Toponimia hispánica. Origen y evolución de nuestros topónimos más importantes’, editáu por Casanova –que pela mañana va falar de ‘Topónimos y antropónimos valencianos explicados a través de la onomástica asturiana’– y coordináu por García Arias.
 
Por último, el xueves día 10, van intervenir Ana Isabel Boullón (Universidade de Santiago de Compostela), Ana María Cano González, Xuan Xosé Lajo Martínez, Clara Elena Prieto Entrialgo, María Dolores Gordón Peral (Universidad de Sevilla) y Stefan Ruhstaller (Universidad Pablo de Olavide).