El PP y el PSOE apoyen la llegalización de l’ocalitu nitens, lo que provoca crítiques d’ecoloxistes

La proposición non de llei del PP presentada na Xunta Xeneral pa llegalizar l’ocalitu nitens salió alantre col apoyu del PSOE. La Coordinadora Ecoloxista critica esta decisión pola peligrosidá que supón esta especie pa les viesques tradicionales.
 
“El nitens ye un cultivu forestal que supón un peligru grave pal restu de viesques asturianes, qu’hasta agora nun se víen afectaes pola plaga de los ocalitos por alcontrase protexíos pola altura, proteición que, de salir alantre esti alcuerdu, nun esistiría y pondría en peligru seriu les viesques del interior”, alerta la Coordinadora Ecoloxista d'Asturies nun comunicáu. Según los ecoloxistes, con esta maniobra lo que se pretende ye llegalizar plantaciones d’esta especie d’ocalitu yá presente en dellos conceyos del occidente, como San Tiso d’Abres y Castropol, pese a ser una especie prohibida nel país. La razón del interés pola plantación de los nitens ye la so resistencia al fríu –aguanta hasta 12 grados baxo cero, más de 50 díes de xelaes y inclusive nevaes–, mayor que la del ocalitu globulus que, en xeneral, nun sobrevive a un altor superior a los 500 metros.
 
“Estos dos partíos pretender facilitar la llegalización d’un acto illegal y consentíu pol PSOE, lo que sienta un precedente peligrosu pa les viesques tradicionales”, aseguren los ecoloxistes, qu’acusen a populares y socialistes de “defender los intereses de la papelera enantes que los del mediu ambiente” y d’incumplir el Plan Forestal actual nun país “onde más del 25 por cientu de la superficie arbolada son plantaciones d’ocalitos. En total más de 80.000 hectárees”.