La revista dixital ‘Ciencies’, de l'ALLA, va tar a disposición de tol mundu na rede a partir del miércoles

Esti llunes tuvo llugar n’Uviéu la presentación del númberu 1 de ‘Ciencies. Cartafueyos asturianos de Ciencia y Teunoloxía’. Esta espublización dixital de l’ALLA de calter añal va tar a disposición de tol mundu na rede a partir del miércoles.
 
El llar de l’Academia de la Llingua Asturiana (ALLA) foi’l llugar escoyíu pa la presentación de “esta nueva revista dixital que tien como oxetivu cimeru esparder na sociedá asturiana los avances ya investigaciones científiques y teunolóxiques, emplegando pa ello la llingua de nuesu y con una perspeutiva divulgadora que favoreza la comprensión de los temes por partes de los llectores interesaos nestos ámbitos”, según reza l’entamu de la espublización que güei lleó Ana María Cano, presidenta de la institución académica, nel actu de presentación. Dirixida por Carlos Lastra, y cola collaboración de la Universidá d’Uviéu al traviés del Vicerrectoráu d’Investigación, ‘Ciencies’ va tar a disposición de tol mundu a partir del miércoles na web de l’ALLA y de la Universidá.
 
Según esplicó Cano, esta espublización da “rempuesta al pidimientu que nesti sen se venía faciendo dende va tiempu y por sectores venceyaos al terrén de les ciencies naturales y de la teunoloxía, darréu que yeren éstos ámbitos en bona midida ayenos al usu comunicativu del idioma asturianu”. Esti pidimientu tuvo llugar nes Xornaes Internacionales d’Estudios de l’ALLA nel 2010, polo que col asoleyamientu d’estos cartafueyos cumple col so compromisu.
 
Xunto a los artículos que protagonicen les charres de la Universidá Asturiana de Branu (UABRA), que van tener preferencia nestos cartafueyos, van apaecer “otros rellacionaos con temátiques d’actualidá o rellacionaos con aspeutos científicos y relevante de la xera investigadora que se da n’Asturies y/o sobro Asturies”. La presidenta de l’ALLA destaca que, “al empar del llabor científicu de la divulgación, nun podemos escaecer la gran importancia que pa la normalización y normativización de la llingua asturiana pue tener una publicación d’esti xeitu”, más si se tien en cuenta que l’emplegu del asturianu nel ámbitu científicu y teunolóxicu “ye enforma más pequeñu, de xuru poles dificultaes propies del usu d’una llingua minoritaria y pol menor númberu d’usuarios y conocedora de la mesma nesos ámbitos”.
 
Por último, Cano quixo treslladar el contentu de la institución que preside pol llogru de la espublización de ‘Ciencies’ y fixo un llamáu a “especialistes ya investigadores pa que coles sos collaboraciones en númberos vinientes faigan más vidable’l proyeutu que, con tantu enfotu, agora entama.
 
Nueve artículos
 
El siguiente en tomar pallabra nel actu foi Santiago García Granda, vicerrector d’Investigación de la Universidá d’Uviéu y autor del artículu de la revista ‘Los nanomateriales, una revolución teunolóxica y un retu pa la Cristalografía’, que destacó que la puesta en marcha d’esta iniciativa “préstame por varies razones. La primera ye que, al ser yo asturianu, cumplo con un deber, una obligación y un compromisu con Asturies y coles iniciatives de l’Academia. La segunda, como científicu, ye un gustu collaborar na divulgación de la ciencia n’asturianu y poner un pequeñu granu d’arena p’acercar el conocimientu y la ciencia a la sociedá y, en particular, a la sociedá d’Asturies”.
 
Según continuó na so intervención, la tercera y “principal”, ye como vicerrector “ya que l’oxetivu del rectoráu na investigación, la tresferencia y la anovación tien que ser favorecer la investigación en tolos ámbitos del saber o rames del conocimientu, y esperder socialmente los avances científicos y teunolóxicos”. Por último, García Granda destacó los conteníos escoyíos y “l’aciertu” de l’ALLA d’espublizar ‘Ciencies’ en formatu dixital “aparte de pol aforru económicu, que ye perimportante nestos tiempos”, porque da a la revista “una dimensión internacional, faciendola accesible y dando-y una difusión fuera de les nueses fronteres”.  
 
Pa zarrar l’actu, Lastra fixo un repasu a tolos artículos qu’inclúi’l primer númberu de ‘Ciencies’ tres recordar al rector Fermín Canella, “qu’espublizó unos cartafueyos d’Asturies que yera un poco’l precedente d’esto, pues uno de los sos enfotos foi’l divulgar precisamente les actividaes académiques y diseñó estos cartafueyos que llueu namái salieron unos pocos y que se publicaron nun llibru que se llama ‘Estudios asturianos’”, y los Nuevos Cartafueyos d’Asturies, “que foi una iniciativa de la Universidá onde participamos unos cuantos profesores col profesor Caso al frente”. D’igual forma tamién mencionó la revista ‘Asturies’, de la Fundación Belenos, y destacó’l diseñu de ‘Ciencies’, a cargu de Nacho Arbesú, y la edición d’Araz, empresa editora tamién d’Asturies.com.
 
Los nueve artículos que componen esti primer númberu de ‘Ciencies’ son ‘Dellos apuntes sobre’l patrimoniu xeolóxicu astur’, de Pedro Farias Arquer; ‘El terremotu de Lorca (Murcia). Asturies, un escenario perestremáu’, de Carlos López Fernández; ‘‘Los nanomateriales, una revolución teunolóxica y un retu pa la Cristalografía’, de Santiago García Granda; ‘Xenomes y cáncer’, de Xosé Antón Suárez Puente; ‘Les llibélules d’Asturies’, d’Antonio Torralba-Burrial; ‘Siete races, un país: (I) L’asturcón y la cabra bermeya’, de Antón Álvarez Sevilla; ‘Campu San Francisco. El primer xardín históricu d’Asturies’, de Carlos Lastra López; ‘Espaciu mediambiental y cultural tradicional n’Asturies’, de Xuan Porta Allende; y ‘Los batanes o pisones n’Asturies’, de Gonzalo Morís Menéndez. Héctor García Gil encargóse de la revisión de los testos, la mayor parte d’ellos escritos orixinalmente n’asturianu.