Candamo acueye unes xornaes sobre ‘Les batalles de Peñaflor’

L’Asociación pa la Recuperación de l’Arquitectura Militar Asturiana 1936-1937 (ARAMA) entama esti sábadu en San Román unes xornaes sobre ‘Les batalles de Peñaflor’. Éstes inclúin la posibilidá de prebar un ‘menú de trinchera’.
 
Les xornaes d'historia militar, con sede nel Palaciu Valdés Bazán de San Román, xiren alredor de la ponte de Peñaflor, que crucia'l ríu Nalón nel escobiu del mesmu nome, cerca de la villa de Grau, y que foi enclave protagonista de dellos fechos d'armes a lo llargo de la so historia: dende la Edá Media a la Guerra Civil, pasando pola Guerra d’Independencia o les guerres carlistes. Un llugar estratéxicu na xeografía del nuesu país que foi clave de manera especial mentes la Guerra de la Independencia y l’intre de la Guerra Civil (1936/37).
 
Evaristo Martínez-Radío, doctor n’Historia, especialista n’Historia Militar y profesor de la UNED, va ser l’encargáu d’abrir les xornaes sobre ‘Les batalles de Peñaflor’, a les 11.30 hores, cola conferencia ‘Peñaflor y el choque de naciones en la Guerra de la Independencia en Asturias’, pa depués dar pasu a Artemio Mortera Pérez, escritor especializáu n’Historia Militar y presidente d’ARAMA, que va dar la ponencia ‘Peñaflor, enclave estratégico en el frente del pasillo de Oviedo durante la Guerra Civil’.
 
Yá pela tarde, a les 16.30 hores, va celebrase una visita guiada, a cargu del investigador d’inxeniería militar de la Guerra Civil y vicepresidente d’ARAMA, J. Enrique Menéndez, a delles posiciones defensives recuperaes nel Espaciu Históricu Frente del Nalón. Toles actividaes de la xornada, a les que tien confirmada la so asistencia Gloria Aranda, conceyala de Cultura de Candamo, van ser presentaes pol historiador José García, catedráticu d’institutu y direutivu d’ARAMA, entidá privada non codalosa qu'impulsa l'estudiu, divulgación y revalorización de los campos de batalla de la Guerra Civil n'Asturies dende una perspeutiva rememorativa, arqueolóxica y patrimonial.
 
‘Menú de trinchera’
 
Pa completar estes xornaes culturales, toles persones que quieran van poder disfrutar d’un ‘menú de trinchera alegóricu al espaciu históricu Frente del Nalón’ n’El Llar de Viri’l sábadu y el domingu. Ésti ta compuestu por un pote de berces o pote de castañes, cachopinos de xata con pataques ‘al batallón’ y salsa de quesu Picón, y compota de mazana con natilles y ablanes de postre. Tamién inclúi vinu de Rioja crianza, agua, pan y un chupitu ‘saltaparapetos’. El so preciu ye de 25 euros y el teléfonu pa reserves, el 985.82.80.22.