La segunda edición de les xornaes culturales ‘De castilletes y carbón’ principia esti xueves

Un recital lliterariu va abrir la segunda edición de les xornaes culturales ‘De castilletes y carbón’, que van celebrase en Ciañu tolos xueves d’esti mes y el primeru d’avientu. Pa zarrar l’actividá ta previstu un conciertu de Nuberu en La Felguera.
 
Estes xornaes culturales xiren alredor “de les interrellaciones ente música, mina, lliteratura, toponimia, sociedá…”, y articúlense nuna serie de ponencies y actividaes que van tener llugar tolos xueves hasta’l 1 d’avientu col Centru de Referencia de la Cultura y la Llingua Asturiana Casa de los Alberti como sede. Les poesíes de Vanessa Gutiérrez, Pablo Rodríguez Medina –ganador recién del VIII Certame de Poesía Nené Losada Rico–, Xulio Arbesú, Manuel Asur y Chechu García van inaugurar estes xornaes entamaes pola Fundación Nuberu y el Conceyu de Llangréu col oxetivu de dinamizar la vida cultural del conceyu, mañana a les 20 hores.
 
El programa de ‘De castilletes y carbón’ va continuar coles ponencies ‘Lliteratura y mina’, a cargu de Benigno Delmiro Coto (día 10); ‘El Conceyu Llangréu na toponimia medieval’, por Xosé Lluis García Arias (día 17); ‘Canciones de mina nel mundu’, con Rubén Vega García como protagonista (día 24); y ‘La huella etnográfica de la mujer en la cultura asturiana reciente: desde la ruptura con la vida campesina hasta la crisis del modelo industrial. Apuntes sobre un futuro incierto’, cola presencia de Heriberto Gutiérrez García. Toles actividaes principien a les 20 hores.
 
Pa terminar estes xornaes, ta previsto un conciertu de Nuberu nel Nuevu Teatru La Felguera coincidiendo col Día de Santa Bárbola (4 d’avientu), festividá de los mineros, una oportunidá única pa poder ver otra vuelta a Chus Pedro y Manolo Peñayos xuntos enriba un escenariu. Esta actuación, que va ser de pagu, ta pendiente tovía de confirmar horariu y preciu.