L’Sporting complícase la vida

L’Sporting perdió’l so cuartu partíu consecutivu, esta vez en casa y frente a un rival directu na llucha pola permanencia, el Mallorca, nun encuentru nel que los asturianos tuvieron una primer media hora de bon xuegu y poco más. Esta nueva derrota mete al equipu xixonés na zona peligrosa de la tabla, a namás dos puntos del descensu.

L’Sporting complícase la vida con una derrota frente a un rival que gracies a los tres puntos alfgamos n‘El Molinón alcanza al equipu xixonés. El partíu entamó con un Sporting mui agresivu, encarando al rival y averándose a la portería visitante bien de veces, anque na mayoría de los casos con pocu peligru real. Sicasí, a los pocos minutos Michel tuvo la meyor ocasión pal Sporting tres un centru de Castro, pero’l xugador sportinguista, con too a favor pa rematar a placer a la rede, mandó’l balón fuera. Mientres el Mallorca aguantaba les incursiones asturianes con orden, intentando sorprender al contrataque. Nun d’eses acciones el Mallorca dio l’avisu mas seriu de la primera parte, cuando dende fuera del área Varela estrelló’l balón nel llargueru xixonés. Un avisu de lo que diba pasar na reanudación.

Y ye qu’un llanzamientu de falta a dos metros del área a los cuatro minutes de la segunda parte y impecablemente executao por Arango valió pa que’l Mallorca marcara’l gol que-y diba a servir p’algamar los tres puntos. A partir d’esi momentu un Sporting espesu nel xuegu, estrellóse una y otra vuelta contra la barrera defensiva balear.

Esta derrota mantién a los asturianos con 27 puntos, nel puestu decimuséptimu de la clasificación. Esti próximu domingu los xixoneses van xugar con otru rival directu na llucha pola permanencia, l’Osasuna.

Ficha Técnica

Sporting de Xixón 0-Mallorca 1

Sporting de Xixón: Lafuente, Cámara, Gerard, Jorge, José Angel, Andreu, Kike Mateo (Barral m 55), Diego Camacho (Luis Morán m 55), Michel, Diego Castro y Bilic (Maldonado m 71)

Mallorca: Aouate, Scaloni, David Navarro, Ramis (Josemi m 75), Ayoze, Martí, Cléber Santana, Varela, Jurado (Keita m 71), Arango y Aduriz (Mario 83)

Goles: 0-1 Arango (m 49).

Árbitru: Teixeira Vitienes (cántabru). Sacó tarxetes amarielles a Kike Mateo (m.15), Aduriz (m.21), Ayoze (m.47), Cámara (m.54), Jurado (m.65), José Ángel (m.68) y Mario (m 89).