Tuenda ufre dos actuaciones esta fin de selmana n'Uviéu y en Bual

Uviéu y Bual van poder sentir esta fin de selmana la música de Tuenda y los cantares del so tercer discu. Mentes, el sábadu en Xixón, dellos grupos asturianos van entamar un conciertu de sofitu a la RTPA onde l’asturianu va tener presencia.
 
El tríu compuestu por Xosé Ambás, Pepín de Muñalén y Elías García va ufrir el primer de los sos dos conciertos d’esta fin de selmana güei, a les 23 hores, nel chigre uviedín Inis Mór, asitiáu na cai Azcarraga númberu 10. Mentes, la banda va desplazase mañana al occidente pa participar nuna cita nueva del ciclu de conciertos ‘Conceyo de Cantares’ qu’entamen los conceyos del Parque Histórico del Navia en collaboración cola Oficina de Coordinación Cultural y Llingüística de la Fundación Parque Histórico del Navia. Nesta ocasión, Tuenda va llevar los sos cantares de siempre y los del so discu nuevu, ‘Tuenda 3’, a la XXV Feria de la Miel de Bual. L’actuación va principiar a les 22 hores.
 
La música n’asturianu tamién va sonar el sábadu en Xixón, na discoteca Oasis, nun conciertu de sofitu a la RTPA entamáu por dellos músicos y bandes asturianes. Asina, ente les actuaciones previstes ta la de Los Berrones, la d’Anabel Santiago y la de Chus Pedro y Gabino. Completen el cartel d’artistes Dark la Eme, Lo Bueno de Wilfred Bada, Rafa Kas, Vaudí, El Patio de tu Casa, La M de Matilde, Flying Padres, Moonglow, Crudo, Muñeco Vudú, Los Izquierdos, M Bolas, Kozmics, The Padron Peppers, Las Tortugas del Desierto, Los Ribera, Karpov, Flutedög, Los Osos, Bongo Mamas y 45 degrees. El conciertu va comenzar a les 19 hores y la entrada ye llibre hasta completar aforu.