Un centenar de persones va acudir al Salón Internacional de Sidres de Gala

El Hotel Villa de Xixón va acoyer esti vienres la primer edición del Salón Internacional de Sidres de Gala. Cerca d’un centenar de persones va acudir a esti eventu que tien como oxetivu la promoción d’estes bébores non escanciables.
 
L’actu va principiar a les 20 hores y va axuntar nesti establecimientu hoteleru a unos 80 profesionales del mundu de la sidra y de la hostelería, gastrónomos, distribuidores y prensa especializada, anque tamién va haber un güecu pa un bon númberu d’aficionaos a la bébora tradicional del país que quieren conocer de primer mano les sidres de gala de los llagares asturianos y d’otros puntos d’Europa, yá que nel eventu los presentes tamién van tener la oportunidá de prebar sidra d’Alemaña, Cymru, Éire, República Checa, Inglaterra o Normaundie. Ente los asistentes, tienen confirmada la so presencia Carlos Rubiera, conceyal de Cultura de Xixón; Xosé Nel Riesgo, direutor de la Fundación Municipal de Cultura, Educación y Universidá Popular de Xixón; y Consuelo Busto, presidenta de l’Asociación de Sidra de Asturias (ASA), ente otros.
 
El salón, qu’entama la Fundación Asturies XXI y la revista La Sidra, en collaboración cola Conseyería d’Agroganadería y la conceyalía de Cultura, céntrase nes denominaes sidres de gala, esto ye, la sidra brut, l’axampanada, la de mesa, la de xelu y los aguardientes de sidra. Sicasí, la sidra natural, que protagoniza otros eventos de los organizadores, tamién va tar presente y tolos asistentes van ser recibíos con unos culinos. L’actu principal del salón va consistir nuna xornada téunica na que va celebrase una cena gourmet compuesta por dellos platos ellaboraos por profesionales con productos asturianos escoyíos de manera espresa pa esta ocasión. Con cada platu van mostrase los ingredientes utilizaos pal mesmu y propondráse’l maridaxe con dos sidres presentaes polos propios llagareros. En total, van ser 20 marques de sidra distintes, a les qu’hai que sumar les que van tar disponibles pa los presentes en delles meses de preba.
 
Hai que destacar que, enantes de la cena, el gourmet Serxu Solares va realizar un caviar de sidra y una yema falsa con sidra de la Champanera de Villaviciosa, amás d’un cóctel con sidra Villacubera, de Mayador. Amás, a lo llargo de la xornada, va proyeutase’l documental ‘Procesual’ sobre la sidra, que va ser esplicáu in situ polos sos autores, y van facese prebes guiaes de sidra.
 
“Esta iniciativa nueva de la Fundación ta centrada na promoción y difusión de les variedaes non escanciables de sidra”, señala la coordinadora del salón, Llucía Fernández Marqués, que recuerda l’enfotu d’Asturies XXI de “vitalizar la bébora tradicional del país como un elementu válidu pa too tipu de contestos y usos sociales”, una idea que tamién defendió’l conceyal Rubiera na rueda de prensa de presentación del eventu. “Ye imprescindible pa los asturianos que tomemos conciencia de que la celebración de cualquier actu institucional o social debe tener la compaña de la sidra asturiana y non de cualquier otra bebida”, señaló d’aquella l’edil de Cultura. Fernández Marques destaca tamién el carauter européu del eventu, similar al que se celebren n’otros puntos del contintente, y la necesidá de puxar por estes sidres asturianes de gala “frente al avance de bébores como’l cava y el vinu español en brindes y celebraciones”.