Xunta Moza pide la dimisión de la directora de la Escuela de Maxisteriu nun actu de la Universidá

La estaya xuvenil de la Xunta pola Defensa de la Llingua Asturiana, Xunta Moza, entamó esta mañana una acción de protesta nel actu de toma de posesión de cargos universitarios n'Uviéu. Los militantes de la organización xunto a dellos estudiantes de maxisteriu repartieron octavilles informatives nes que se pedía "la dimisión inmediata de la directora de la Escuela Universitaria de Maxisteriu pola so propuesta d’esclusión de la llingua asturiana de los nuevos planes d’estudiu".

Recordóse asimesmo "l’asaltu a la llegalidá vixente que propón esta dirección. La Llei 1/98 d’Usu y Promoción del Asturianu recueye: La Universidá d’Uviéu tien de garantizar la capacitación del profesoráu pal enseñu del asturianu y el gallegu-asturianu na enseñanza reglada".

Los estudiantes desplegaron una pancarta onde podía lleese "Por una escolarización n’asturianu. Escuela de Maxisteriu" y reclamaron la creación d’una Mención de llingua Asturiana, como midía indispensable pa la formación de los futuros mayestros y mayestres, y la presencia d’asignatures de llingua Asturiana nos estudios comunes d’Educación Primaria y Secundaria.

Sobre esti mesmu conflictu, la Xunta pola Defensa de la Llingua Asturiana tien convocada una manifestación el prósimu día 7 de marzu a les 17:00 na Estación del Norte d’Uviéu col lema "La llingua asturiana en Maxisteriu y nel sistema educativu ¡Como les demás!".