La música asturiana va protagonizar una de fin de selmana cargada de conciertos y folixa

Mezá, Skama la Rede y Skontra van protagonizar una fin de selmana cargada de conciertos y muncha folixa. Una de les cites con más tirón ta en La Pola Ḷḷena, población que celebra estos díes Les Feries del Rosario.
 
Los bualeses Mezá van ufrir dos conciertos nel occidente del país. El primeru va tener llugar esta nueche, a partir de les 22 hores, nel restaurante La Marquesita, en Samartín d’Ozcos, dientro de les xornaes culturales ‘Cultura contra el olvido’ qu’inclúin, tres l’actuación de Mezá, una sesión de grupos de rock llocales. Mentes, la banda folk va repetir conciertu’l sábadu, nesti casu en Pezós, dientro del ciclu ‘Conceyo de Cantares’ qu’entama los conceyos del Parque Histórico del Navia xunto cola Oficina de Coordinación Cultural y Llingüística de la Fundación Parque Histórico del Navia. Ésti va tener llugar a les 20 hores n’El Parque coincidiendo cola celebración de la Festa del Viño.
 
Nel centru del país, van celebrase los XI Alcuentros de Trebolgu nel uviedín parque del Oeste. Pela carpa instalada nel llugar van pasar la Bandina La Curuxa; la Banda Gaites Villaviciosa-El Gaitero, que presenta l’espectáculu que prepararon pa celebrar el so 25 aniversariu; los asturbretones Latira; y Skama la Rede. Les actuaciones van principiar a les 22 hores.
 
Les Feries, en La Pola Ḷḷena
 
Esti añu, los conciertos de Les Feries de La Pola Ḷḷena van tar protagonizaos por bandes asturianes. Asina, el patiu de les escueles Juan Neira va acoyer esta nueche les actuaciones d’Arma X y Mokomitas (23 hores); de Noche Oculta y Dark la eMe (23 hores), mañana; y d’Adizión Etílika y Skontra (22 hores), el domingu. Amás, la ciudá va vivir una gran cantidá d’actividaes y actuaciones d’orquestes esta fin de selmana.