La serie documental ‘Rincones secretos’ dedica un capítulu a la mitoloxía asturiana

La Canal Historia estrena esti vienres un capítulu de la serie documental ‘Rincones secretos’ dedicáu a la mitoloxía asturiana. L’episodiu, d’unos 25 minutos de duración, inclúi entrevistes con González Quevedo y Álvarez Peña.
 
Según informó la cadena, que pue vese per Telecable y dellos operadores de televisión de pagu, ‘Mitología de Asturias’ repasa “numberosos paraxes asturianos y entrevista a especialistes na materia, como Roberto González Quevedo, antropólogu y profesor de la Universidá d'Uviéu, y Alberto Álvarez Peña, etnógrafu y ún de los primeres illustradores que dibuxó sobre'l papel la imaxe de los personaxes que componen la mitoloxía d'Asturies”. Asina, los telespectadores de tol Estáu van poder conocer al Nuberu, les Xanes, el Cuélebre, el Busgosu y otros munchos personaxes de la mitoloxía asturiana, “una de les más riques y fascinantes de la Península Ibérica".
 
El capítulu de ‘Rincones secretos’ dedicáu a la nuesa mitoloxía va estrenase a les 18.30 hores del vienres y va emitise otra vuelta de madrugada, a les 2.30 hores, y a les 10.30 hores del sábadu. Enantes, a les hores en puntu, los telespectadores van poder conocer tamién ‘Leyendas de Sevilla’. Esta serie documental de Canal Historia ta dirixida por Regis Francisco López y dedica capítulos a Madrid, Catalunya, Galicia, Euskadi y Navarra.