Mediu Rural garantiza la recoyida de lleche a los productores asturianos tres la retirada de Pascual

|

La Conseyería de Mediu Rural y Pesca del Principáu algamó garantíes bastantes pa asegurar qu'empreses llecheres asturianes sustituyan al Grupu Pascual na recoyida de lleche, tres la decisión d'esta empresa de nun recoyer n'Asturies de magar el próximu 1 de marzu. Los cerca de 13 millones de kilos de lleche que'l Grupu Pascual recoyía n'Asturies, poro, asumíos por otros compradores.
 
Según informó la Conseyería nuna nota prensa, diches garantíes s'algamaron gracies a les xesiones realizaes dende primeros d'esta selmana pola Conseyería de Mediu Rural y Pesca col Grupu Pascual y con otres empreses llecheres asturianes, col oxetivu de que nengún ganaderu de la rexón "se viere afeutáu pola decisión del citáu grupu llecheru". Frutu d'estes conversaciones, la Conseyería algamó'l compromisu firme del Grupu Pascual de "nun realizar un cese bruscu de la recoyida enantes de que'l ganaderu afeutáu tenga un comprador alternativu".
 
La Conseyería, según informó al traviés d'una nota prensa, confirmó l'interés de delles empreses llecheres del Principáu de sustityir al Grupu Pascual na recoyida de lleche y "hasta dalgunes d'elles yá establecieron contactos colos ganaderos afeutaos pa ofrecese a comprá-yosla".
 
Mediu Rural llanzó a los productores asturianos un mensaxe de tranquilidá, y "a les cerca de 70 esplotaciones del centru y oriente de la rexón qu'hasta agora vendíen la so lleche a Grupu Pascual".

Contador Estadistiques