L'ALLA y N'Ast critiquen la postura del PSOE de Noreña al torgar una moción sobre l’usu del asturianu

5 Ochobre, 2011 por Redacción

Inicie sesión o rexístrese pa espublizar comentarios

Los votos contrarios del PSOE y Ideas, y l’astención de FAC y PP, torgaron una moción de Conceyu Abierta por Noreña pa que’l Plenu aceptara mociones n’asturianu. L'ALLA y N’Ast mostráronse mui críticos colos socialistes.

Nuna primer votación de la moción presentada la selmana pasada pol conceyal nacionalista Pablo Pérez, hubo un empate ente a cinco votos: los 4 del PSOE, que tien l’alcaldía, y el del so sociu de gobiernu, Ideas, polos 3 d’Independientes por Noreña (3) y el del Frente de la Izquierda y Conceyu Abiertu por Noreña. Un empate que pudo desfacese colos votos del edil del PP o’l de FAC, l’asturianista Inaciu Iglesias, pero dambos astuviéronse. Yá nuna segunda votación, repitióse’l resultáu, polo que foi l’alcalde, César Movilla, el que decidió torgar la moción “en base a que nun tenía cuestión d’urxencia”, esplica l’Asociación Cultural N’Ast.

“Na moción de Conceyu Abiertu solicitábase que l’Ayuntamientu de Noreña realizara xestiones pa llograr convenios con instituciones como l'Academia de la Llingua Asturiana (ALLA) y la Oficina de Política Llingüística p'asesoramientu y traducciones, o l'Institutu Adolfo Posada pala formación voluntaria de trabayadores, funcionarios y conceyales”, espliquen dende’l coleutivu, que quier denunciar “qu'una vegada más el PSOE de Noreña vuelve amosanos el so verdaderu calter como organización fondamente antiasturiana y antidemocrática, torgando non solamente l'exerciciu d'un derechu humanu y civil, sinón tamién l'alderique públicu sobre la posibilidá del so usu institucional”.

Pela so parte, l’Academia de la Llingua Asturiana (ALLA) mostró nun comunicáu la so más fonda esmolición “énte la reiterada falta de respetu qu’amuesa’l rexidor noreñense hacia la llingua y la cultura asturiana ya, inda más, hacia’l propiu derechu de los ciudadanos del conceyu a usar la llingua d’Asturies”. “Refugar les mociones sobro l'asturianu, una y otra vuelta, cola xida de problemes ‘reglamentarios’ da cuenta perfeutamente del allugamientu, oxetivamente anti-asturianu, del Sr. Alcalde y tresllada a la sociedá asturiana, una vegada más, la necesidá de d’atayar situaciones como les descrites pente medies del reconocimientu del asturianu como llingua oficial n’igualdá de condiciones que’l restu de llingües del Estáu”, finaliza’l documentu.

Iglesias recomienda tramitar la moción otra vuelta

El conceyal únicu de FAC en Noreña, Inaciu Iglesias, que s’astuvo na votación, argumentó qu’él taba d’alcuerdu col fondu de la moción presentada por Pérez, anque non col procedimientu, lo que lu llevó a tomar esa decisión. Por ello, recomendó a Conceyu Abiertu por Noreña a tornar a tramitar la moción con más rigor p’algamar que’l Plenu acepte mociones na llingua del país.

Otra manera, hai que resaltar l’actitú de Belén Junquera, edil por Ideas, partíu que na precampaña eleutoral, al traviés del so cabeza de llista Juan Morales, amosó’l so compromisu pa col asturianu, dalgo que nun ta cumpliendo en Noreña.