El paru torna a xubir n’Asturies hasta sumar 82.122 desemplegaos

Les cifres del paru, tres rexistar un pequeña xuba n’agostu del 0,83 por cientu depués de dellos meses de descensu, tornó a medrar en setiembre de manera considerable. Nesti mes crecieron nun 3,46 por cientu pa sumar 82.122 desemplegaos.
 
Esti incrementu ye mayor que la media estatal, que foi de 2,32 por cientu, lo que supón una medra de 95.817 persones que dexen la cifra final de 4.226.744 paraos, según informen los datos del Ministeriu de Trabayu y Inmigración. El númberu de persones que demanden trabayu aumentó'l mes pasáu n'Asturies de manera fundamental nel sector servicios, onde se rexistraron 2.610 paraos. Tamién medró nel coleutivu esin emplegu anterior, con 156 paraos más, y nel d'industria, con 49. Sicasí, el paru baxó nos sectores d'agricultura y construcción, con 24 y 42 paraos menos, de manera respeutiva. De los 82.122 desemplegaos qu’hai n'Asturies, 39.049 son homes y 43.073 muyeres; un total de 8.345 son menores de 25 años (4.422 homes y 3.912 muyeres) y 73.777 son mayores d'esa edá (34.616 homes y 39.161 muyeres).
 
En comparanza colos datos d’hai un añu, la medra de paraos foi del 8,05 por cientu, lo que supón 6.120 persones más nes llistes del paru. Esta tasa tamién ye superior a la media estatal, que fixó una xuba del 5,20 por cientu.