El Gobiernu aprueba una mengua nueva del gastu por 157 millones

El Conseyu de Gobiernu aprobó un segundu alcuerdu de contención del gastu, que supón una reducción de 156,8 millones d’euros. Esta mengua nun afeuta “a les prestaciones sociales, nin a Sanidá y Educación”, afirmó Álvarez-Cascos.
 
L’alcuerdu, que s'encuadra nel cumplimientu de la estabilidá presupuestaria, súmase a les midíes de reducción de la estructura de l'alministración del Gobiernu asturianu aprobaes a últimos del mes d'agostu que se traduxo nuna contención del gastu de 4.996.052 euros. D'esta manera l'importe total de la suma de dambos alcuerdos implica un aforru de 161.848.959 euros, lo que supón un 3,65 por cientu del presupuestu nacional pal 2011. En too casu, el presidente Francisco Álvarez-Cascos nun descartó qu’haya que facer otru alcuerdu asemeyáu en función de les circunstancies.
 
El llíder de FAC esplicó qu'esta decisión básase nun esfuerzu de reducción del gastu corriente, la reprogramación d'inversiones y tresferencies de capital o la revisión del presupuestu y contención del gastu. Tamién que nenguna de les midíes afeuta a proyeutos d'inversión cofinanciaos con fondos mineros o otros proyectos vinculaos a ingresos, de forma tala que nun se cuerre'l riesgu de perder esos recursos.
 
“El Gobiernu asturianu asume'l so compromisu d'encarar de forma decidida un cambiu fondu na política presupuestaria y fiscal pa incorporase al programa d'estabilidá presupuestaria d'España”, señaló Álvarez-Cascos. L'alcuerdu inclúi un plan pa la reducción de 300 vehículos oficiales d'un total de 691 turismos acreditaos nel parque móvil de les conseyeríes, y de 1.000 llinies de telefonía móvil de les 2.311 existentes na Alministración. Tamién mengua’l gastu en material d'oficina, dietes y demás gastos vinculaos al so funcionamientu ordinariu.
 
L'aforru mayor, en Fomentu
 
Por conseyeríes, nes que más s'aforró hasta la fecha son les de Fomentu, Ordenación del Territoriu y Mediu Ambiente, y la de Facienda y Sector Públicu, con 55,8 y 53,5 millones, de manera respeutiva. Polo que se refier a la primera, redúcense 7,8 millones en carreteres, 4,3 en tresportes y 2,6 millones n'urbanismu. Na Xunta de Saniamientu'l recorte ye de 31,9 millones. Mentes, en Facienda’l recorte más significativu ye'l de les partíes destinaes a gastos financieros: 33,6 millones. Amás, se contién el gastu nes tresferencies a la Radio Televisión d'Asturies, que queda con 11,3 millones menos.
 
L'aforru nel restu de conseyeríes ye de 14,4 millones n'Economía y Empléu; 11,8 en Bienestar Social; 9,4 n'Agroganadería y Recursos Autóctonos; 5,9 n'Educación y Universidaes; 3,9 en Cultura y Deporte; 973.875 euros en Presidencia; 659.253 euros en Sanidá; y 383.544 euros en Presidencia d'Asturies.