Educación axudica les 23 places pendientes de Llingua Asturiana

Los escolinos de les 23 escueles que continuaben ensin maestru de Llingua Asturiana pese a llevar delles selmanes de colexu van poder recibir clase dende’l llunes. El xueves, Educación axudicó toles places pendientes en Primaria
 
La Conseyería d’Educación y Universidaes fixo usu de les llistes provisionales d’asturianu, coles reclamaciones yá atendíes, p’axudicar estes places. “Creemos que nun espublizaren les llistes definitives d’asturianu porque teníen priesa y queríen tener tolos puestos ocupaos pa la selmana qu’entra”, señala Xose Lluis Colodrón Ardura, responsable de la Secretaría de Llingua del Sindicatu Unitariu y Autónomu de Trabayadores de la Enseñanza d’Asturies (Suatea), qu’apunta “que deberíen asoleyales yá”.
 
L’axudicación de la totolidá de les places d’asturianu y gallego-asturiano en Primaria y Secundaria foi ún de los asuntos más protestaos por Suatea esti mes, anque’l sindicatu nun pierde de vista otres reivindicaciones con respeuto a la situación asturianu nel sistema educativu. Asina, reclama que’l currículu d’Infantil recueya la llingua asturiana y que, demientres, s’atiendan toles demandes d’escolarización recoyíes polos centros; que les places d’asturianu y gallego-asturiano pasen a formar parte de les plantiyes orgániques de los colexos; la creación inmediata de la especialidá; la convocatoria d’oposiciones n’igualdá de condiciones con otres especialidaes docentes; que s’axeiten Planes Llingüísticos que dean un tratamientu integráu y coordináu de toles llingües que s’enseñen y que la llingua sía vehicula en delle árees; que s’ufierte en Formación Profesional, en Escueles d’Adultos, na Escuela d’Idiomes y na Universidá; y que s’eliminen les ratios mínimes d’alumnáu pa recibir clases d’asturianu o gallego-asturiano en tolos niveles educativos, acatando la setencia del Tribunal Superior de Xusticia d’Asturies ante la que’l Gobiernu anterior interpuso un recursu. “Una bona forma d’amosar el respetu del Executivu actual a la Llei d’Usu sería retirar esti recursu”, destaca Colodrón.