El catalán Jordi Llavina viaxa a Asturies pa presentar la edición n’asturianu de ‘Londres nevat’

‘Londres nevao’ ye’l nome que recibe la traducción al asturianu de la obra ‘Londres nevat’ del escritor catalán Jordi Llavina que va presentase esti xueves n’Uviéu. Ramón d’Andrés encargóse de la torna al nuesu idioma d’esti llibru.
 
Escritu nel añu 2009, ‘Londres nevao’, espublizáu por Publicaciones Ámbitu, son seis rellatos ambientaos nel iviernu nos que l’autor describe psicolóxicamente a los personaxes al traviés de detalles pequeños y nos qu’esiste una confusión ente’l narrador y l’autor. Trátase d’una de les meyores creaciones de Llavina, autor que tamién trabaya la poesía y la crítica lliteraria.
 
El salón d’actos del Real Institutu d’Estudios Asturianos (RIDEA), na plaza Porlier númberu 9 d’Uviéu, ye’l llugar onde va tener llugar la presentación de la obra de Llavina, primera tornada al asturianu del autor catalán, esta tarde a les 19.30 hores. Xunto col de Gelida van tar presentes D’Andrés y Xuan Bello.