Villoria acueye’l III Alcuentru de Pandereteres y Música Tradicional Conceyu de Llaviana

Esta fin de selmana va tener llugar en Villoria’l III Alcuentru de Pandereteres y Música Tradicional Conceyu de Llaviana. L’Asociación Cultural Molín d’Entrialgo entama esta cita que va centrar la mayor parte de la so actividá’l sábadu.
 
El vienres va inaugurase’l certame con un taller d’instrumentos tradicionales pa neños y neñes, a les 17.30 hores, y va acoyer a la mayor parte de los asisitentes que van facer nueche nel polideportivu del pueblu, acondicionáu pa servir d’agospiu nel alcuentru gracies a la collaboración de l’Asociación Social y Cultural El Texu, que tamién cede’l so centru cultural pa desarrollar los cursinos previstos. Yá de sábadu, la primer actividá van ser unes clases de pandereta asturiana a cargu d’Eva Tejedor que van tener llugar de 10.30 a 12.30 hores, pa depués, tres media hora de descansu, facer una visita cultural per tola parroquia tres la qu’Eva va ufrir una exhibición na plaza de la Ilesia. Nesi mesmu llugar van entregase los premios del concursu de cartelos pa neños y neñes. Mentes, de 11 a 19 hores, los visitantes van poder disfrutar de los puestos artesanos y de comida del Mercáu Tradicional, amás de les actuaciones de la Bandina Tradicional de Gaites Valle del Nalón.
 
L’Asociación Cultural Tierra de Pan, de Zamora, va protagonizar les clases vespertines col enseñu, de 17 a 18.30 hores, del ‘paloteo zamorano’, pa depués, a les 19 hores, ufrir una actuación na plaza la Ilesia. Darréu, l’amenización de la fiesta va correr a cargu del Grupu d’Acordiones de Villoria. Yá pela nueche, a partir de les 23 hores, la organización tien preparada una actuación del Grupo de Pandereteras El Mimbral, de la población cántabra de Fresno del Río, pa depués dexar pasu a cualquier persona que quiera tocar sobre l’escenariu y disfrutar de la música hasta bien entrada la madrugada.
 
El preciu p’asistir a los talleres ye de 5 euros, mentes que les persones que tamién quieran facer nueche en Villoria –los dos díes, col almuerzu incluyíu– van poder facelo por 15 euros más. Pa ello deben de ponese en contautu cola organización al traviés del corréu electrónicu molindentrialgo@gmail.com o de los númberos de teléfonu 630.424.169 y 625.774.271.