Vicente García Oliva gana’l Premiu Montesín de Narrativa Xuvenil

L’escritor xixonés Vicente García Oliva, cola obra "Fontenebrosa II: la rebelión de los homosaurios", ye'l ganador del Premiu Montesín de Narrativa Xuvenil, que convoca Ediciones Trabe en collaboración cola Conseyería de Cultura y Turismu. Resultaron finalistes les obres "Repuelgos" y "La maldición de Llucescuria".

Según informa al traviés d'un comunicáu Trabe, editorial convocante del premiu, el xuráu tuvo presidíu pol maestru Severino Antuña y formáu por María Antonia Pedregal Montes, xefa del Serviciu de Política Llingüística; María Xosé Rodríguez, xefa de la Oficina Municipal de la Llingua de Xixón; Alejandro Vega, alcalde del Conceyu de Cabranes –d’onde yera la filóloga y escritora María Josefa Canellada, autora de Montesín, títulu de la obra xuvenil que da nome al premiu de Trabe–, y la escritora Esther Prieto Alonso. Fixo de secretariu l’editor Inaciu Iglesias Fernández.

El premiu consiste, amás d’una dotación económica de 3.000 euros, na entrega d’una escultura de María Jesús Rodríguez y la publicación de la obra nuna de les colecciones xuveniles d’Ediciones Trabe.

"Fontenebrosa II: la rebelión de los homosaurios" ye la continuación de "Fontenebrosa: el reinu de los silentes", que publicara nesta mesma editorial l'escritor xixonés yá hai bien d’años y que fuera un éxitu de crítica y públicu.
 
Vicente García Oliva ye collaborador habitual na sección d'opinión d'Asturies.com