Foro Asturias Ciudadano abre sede en Madrid de cara a les eleiciones

Tres l’aprobación, el llunes, del decretu que convoca eleiciones xenerales el 20 de payares, Foro Asturias Ciudadano (FAC) va inaugurar esti miércoles una sede en Madrid. Ésta ta situada na zona de Moncloa.
 
La inauguración oficial del llocal va tener llugar pela tarde, n’horariu tovía por confirmar, y va tar presidida por Francisco Álvarez-Cascos, presidente d’Asturies y llíder del partíu. El llocal ta situáu na cai Hilarión Eslava, númberu 49 baxu, na zona de Moncloa y nella va organizase tola campaña eleutoral del partíu ‘rexonalista’ asturianu na Comunidad de Madrid pa la cita coles urnes del 20-P.
 
Nel llocal madrilanu, los simpatizantes tamién van alcontrar tola información del partíu y van poder afiliase al mesmu, asina como avalar a FAC y poder llegar a les 5.000 firmes esixíes tres el cambiu fechu na Llei Orgánica de Réxime Elecutoral Xeneral (Loreg) qu'afecta a toles organizaciones polítiques qu'esti añu nun tienen representación nes Cortes Xenerales. Tamién grupos de voluntarios van instalase en distintos puntos de Madrid pa recoyer avales nes cais a lo llargo de los próximos 20 díes.
 
Coles mesmes, dende güei, FAC va promover la so presencia n'Internet con actualizaciones constantes de la so web y una mayor presencia nes redes sociales pa favorecer les aiciones informatives y de participación de los sos afiliaos, simpatizantes y públicu polo xeneral.