Vallaure anuncia un Plan de Normalización 2012-2015

Na so comparecencia ente'l Parllamentu asturianu, na que fixo un repasu a les exes que van marcar la so política, el conseyeru anunció qu'el gobiernu asturianu desarrollará la Llei d'Usu y echará a andar un Plan de Normalización.

Nuna intervención, que no tocante a la Dirección Xeneral de Política Llingüística  fixo n'asturianu, el conseyeru de cultura defendió la llingua asturiana y el gallego-asturiano como "un factor sustancial de la identidá asturiana y como llingües d'España y polo tanto parte del patrimoniu común".
 
Vallaure afirmó que la llingua asturiana tien de contribuir a crear espacios de "tolerancia y llibertá" y comprometióse a la dignificación de lo que definió como una realidá llingüística en retrocesu "dende la voluntariedá".
 
Tamién se refirió a "les llingües d'Asturies" como patrimomiu y "fonte de derechos", no que quiciabes ye la mayor novedá nel planu del discursu respecto a executivos anteriores.
 
Ente les midíes concretes anunció un Plan de Normalización 2012-2015.