Asturies vive’l Día Européu ‘La ciudá, ensin el mio coche’

Dende’l día 16 ta celebrándose la Selmana Europea la Movilidá, que esti xueves, día 22, vive la so xornada principal col Día Européu ‘La ciudá, ensin el mio coche’. El so oxetivu ye sensibilizar sobre l’usu del tresporte públicu y de la bicicleta.
 
Cerca de 2.000 ciudaes europees, entes les que s’alcuentren Xixón y Mieres, preparen pa esta selmana delles actividaes. Asina, los escolinos y escolines xixoneses pudieron recibir cursos d’educación vial estos díes, mentes que les persones adultes tuvieron la opción de participar n’inicatives que promocionaben l’usu de la bicicleta o presenciar una mesa redonda. Pa güei ta prevista una ‘bicicletada popular’ na Plaza Mayor a partir de les 18.30 hores. Mentes, el Conceyu de Mieres celebra delles actividaes na cai Manuel Llaneza ente les 10 y 14 hores, y 16.30 a 20.30 hores; baxa’l preciu del autobús públicu a 50 céntimos; y va establecer una velocidá máxima de 30 quilómetros por hora pel centru de la ciudá.
 
 Pa la Coordinadora Ecoloxista d’Asturies esta xornada ye una oportunidá grande pa que les autoridaes públiques “pueden poner a prueba otres alternativas de movilidá urbana más respetuoses col entornu: sistemes de repartu con vehículos ecolóxicos, llinies de tresporte públicu, coches compartíos, carriles para bicicletes, zones de peatones, topes pal tráficu”. “Ye una apuesta pola calidá de vida”, resalten los ecoloxistes, que critiquen que “esti día dalgunos ayuntamientos van tomar iniciativas pequeñes de cara a la galería lloñe de les apuestes necesaries por otres formas de tresporte nos entornos urbanos que faigan les ciudaes asturianes más saludables”.
 
D’igual forma, esti coleutivu recuerda qu’Asturies ye un territoriu mui contamináu como demuestra’l fechu d’encabezar el ranking de polución del Estáu en partícules PM10, “un problema que llevamos padeciendo décades na zona central asturiana” y que continúa ensin solución pola “complicidá de les alministraciones responsables –Gobiernu y conceyos– que deben velar por cumplir el marcu llegal que, de manera sistemática, s’incumple”. Por ello, la Coordinadora reclama al Gobiernu entrantey a los equipos de gobiernu municipal nuevos “midíes reales que favorezan el tresporte publicu, l’usu de la bicicleta na ciudá y el tránsitu peatonal ensin riesgos; toes elles midíes pa meyorar la calidá de vida de tolos asturianos”.