Los grupos asturianos que toquen en San Mateo amuesen el so malestar pol despreciu de la SOF

Avalanch, Dark la Eme, Mokomitas y Stormy Mondays roblaron un manifiestu común nel que protesten pola falta de respetu que la SOF tien hacia los grupos asturianos. Ente otres coses, nun los nomen nel videu promocional de les fiestes uviedines.

 

Pa estes bandes contrataes pola Sociedad Ovetense de Festejos (SOF) pa tocar esti añu en San Mateo, “el reflexu de too esto ye que’l spot promocional de les fiestes, tanto’l de la radio como’l qu’estos días apaez en Youtube, nun nomen a nengún de los artistes asturianos que participen de las fiestes, salvo a Jerónimo Granda, Melendi y Hevia. Tampoco ye una cuestión d’espaciu, porque los díes qu’hai tres artistes ‘foriatos’, se noma a los trés ensin problema”, espliquen nel comunicáu. Por ello, les cuatro fomaciones aseguren nun entender “l’afán del Ayuntamientu por esconder la participación de los artistes asturianos qu’ellos mesmos decidieron contratar, eso sí, depués de quita-yos el 8 por cientu del so caché poles xestiones feches, porcentaxe según ellos ‘legal’”, dalgo que namái pasa n’Uviéu y colos asturianos, non colos promotores de fuera del país, según confirmen. D’esta forma, el Conceyu d’Uviéu actúa como promotor llocal y compite col sector, dalgo que “nun paez lo más correuto pa estos tiempos de crisis”.

 

Con una amplia esperiencia detrás, estes bandes llamenten esta falta de respetu a grupos asturianos de gran repercusión fuera de les nueses llendes con situaciones como la del llunes 19, fecha na que tocaben na plaza la Catedral Jorge Ilegal y los Magníficos xunto con Mokomitas, grupu campeón del Concursu de Rock ‘Ciudá d’Uviéu’ del añu pasáu, y Carlos Baute, nomando namái na publicidá al cantante venezolanu. “Ta claro que la SOF y el Conceyu d’Uviéu consideren la música asturiana un estorbu, una llosa que deben llevar p’aparentar y que nun se-yos pueda reprochar nada. Nos contraten ensin nengún tipu de respetu nin consideración; programen les nueses actuaciones colos artistes más estremaos no estilístico, como un simple rellenu nuna programación que carez de cualquier criteriu musical na so organización”, finalicen.

 

 

L’Asociación Cultural N’Ast asoleyó un comunicáu nel qu’apoyen les reivindicaciones de los cuatro grupos asturianos que firmaron el manifiestu. “Una vegada más, por cuenta de les fiestes d’Uviéu, torna a evidenciase que na axenda cultural del so Ayuntamientu siguen pesando unos criterios fondamente sucursalistes qu’impliquen que la producción musical del país sía arrequexada siempre en posiciones vergoñoses y marxinales”, manifiesten.

 

“Los xestores culturales del Ayuntamientu amuesen con esto una actitú más típica d’una alministración colonial que d’una xestión pública al serviciu de los ciudadanos y ciudadanes”, continúen, pa depués criticar unes fiestes que “dexen munchu que desear nel so conxuntu, dende la forma de la contratación hasta la mesma programación final que prescinde inclusive de cualisquier criteriu estilísticu”.