L’Archivu de la Música Tradicional edita un llibru que recueye’l trabayu de Alan Lomax n’Asturies

El trabayu que’l prestixosu etnomusicólu estauxunidense Alan Lomax fixo n’Asturies yá pue disfrutase gracies a ‘Alan Lomax in Asturias. November 1952’. Esti llibru vien acompañáu por dos CDs que recueyen 101 cantares, la mayoría inéditos.
 
‘Alan Lomax in Asturias. November 1952’ trátase del númberu 13 de la coleición ‘Fontes Sonores de la Música Tradicional Asturiana’ qu’edita l’Archivu de la Música Tradicional del Muséu del Pueblu d’Asturies. Esta obra, compuesta por 170 páxines d’información n’asturianu, inglés y castellanu, amás de dos CDs con un total de 101 cantares recoyidos por Lomax na seronda del 1952 n’Asturies, foi posible gracies a la collaboración del Alan Lomax Archive de New York al traviés de la Cultural Equity Association, siendo’l sellu discográfiu Odissey Productions. Los coeditores del llibru son Fernando Ornosa, responsable del Archivu, y la canadiense Judith Cohen, mentes que los autores de los testos son Lisardo Lombardía, Fidela Uría, Naciu Llope y la propia Judith Cohen.
 
Lomax, fíu del tamién etnomusicólogu John Avery Lomax, conocíu pol so trabayu de recuperación de los cantares qu’entonaben los esclavos afroamericanos del sur de los Estaos Xuníos, viaxó a les Illes Balears, Aragón, Euskadi, Galicia, Lleón, Andalucía, Castilla, Italia, Irlanda, Rumanía y Portugal pa recoyer la música tradicional de caún d’estos llugares. N’Asturies, Lomax visitó los conceyos de Cabrales, Llanes, Siero, Xixón, Uviéu, Mieres, Ayer, Somiedu, Miranda y Valdés, faciendo asina ún de les primeres investigaciones de campu sobre la música tradicional del país, quiciabes la más completa. Agora, esti trabayu editáu pol Archivu de la Música Tradicional, una xoya que ta teniendo repercusión n’Estaos Xuníos y Portugal, según confirma Ornosa, permite a tolos interesaos disfrutar del gran llabor que fixo nel nuesu país esti estudiosu estauxunidense que nun tuvo les coses fáciles pola presión del réxime franquista.