Bloque-UNA defende’l mantenimientu de les escueles rurales "mentes esistan alumnos"

Bloque-UNA de Ḷḷena criticó'l pieslle de la Escuela Rural de La Vega’l Ciigu pola supuesta falta d’un alumnu p’algamar el númberu de places mínimes que marca Educación. La coalición defende’l mantenimientu d’estes escueles.
 
Xosé Agripino Pérez Acebal, conceyal de Bloque por Asturies-Unidá Nacionalista Asturiana (UNA), acusa de manera direuta de la situación d’esta escuela rural al conceyal d’Educación, Cultura, Mocedá y Turismu, Rolando Díaz Ordóñez (IX-LV), tamién responsable de Política Llingüística y vecín de La Vega’l Ciigu, al entender que pudo evitar el pieslle de matricular a la so fía nel colexu del pueblu. “Consideramos que, cuando dalguien ocupa un cargu públicu, nun pue haber contradicción ente les opiniones y decisiones polítiques y les decisiones personales. Nun se pue afirmar como conceyal d’Educación que s’apuesta poles escueles rurales y llueu tomar una decisión personal que permite’l pieslle de la escuela del pueblu onde vive, cuando ta nes sos manes l’evitalo”, asegura Pérez Acebal.
 
Nun comunicáu robláu pol conceyal ḷḷenizu de Bloque-UNA, la coalición asegura apostar “pol mantenimientu de les escuelas rurales como elementos dinamizadores de los pueblos”, polo que considera que’l pieslle del colexu de La Vega’l Ciigu ye una “mui mala noticia”. “En llugar d’apostar por un desarrollu estratéxicu de la zona rural, cada vez se tomen más midíes que recorten servicios y prestaciones”, afirma Pérez Acebal, qu’añade que la coalición defende’l “mantenimiento de les escueles rurales mentes esistan alumnos, sía nel númberu que sía”.
 

Respuesta de Díaz Ordóñez
 
El conceyal Díaz Ordóñez respondió a les acusaciones de Pérez Acebal asegurando nel diariu ‘La Nueva España’ que ye “falsu dafechu” que la Escuela Rural de La Vega’l Ciigu pesllara pola falta d’un alumnu. D’igual forma, reconoció que la so fía nun taba matriculada nel colexu del pueblu “por razones personales de pesu”.
 
L’edil d’IX-LV reafirmóse na defensa de les escueles rurales –trabaya como profesor nuna d’elles– y aseguró que tuvo buscando alumnos hasta última hora pa evitar el pieslle de la de La Vega'l Ciigu. Tamién criticó l’actitú del conceyal de Bloque-UNA poles sos declaraciones.