Morcín prepara la celebración del IV Concursu-Esposición Nacional del Gochu Asturcelta

El sábadu 1 d'ochobre va tener llugar en Santolaya (Morcín) el IV Concursu-Esposición Nacional del Gochu Asturcelta. 135 exemplares procedentes de 16 ganaderíes van participar nesta edición, na que ta previsto'l repartu de 100 quilos de picadillu.
 
La cita, la más esperada pa los criadores y aficionaos a esta raza autóctona, ta entamada pola Asociación de Criadores del Gochu Asturcelta (ACGA) en collaboración col Conceyu de Morcín y l’Asociación de Muyeres So la Malena, amás de contar col sofitu de la Conseyería d’Agroganadería y Recursos Autóctonos. Na xornada van poder contemplase los meyores exemplares del páis y va disfrutase de la posibilidá de prebar productos ellaboraos a partir d’este animal que ta abriendo un güecu nel mercáu alimentariu gracies a la calidá de la so carne.
 
Los gochos asturceltes van aportar a Santolaya’l vienres y l’actividá nel recintu va principiar el sábadu, alredor de les 9.30 hores, cuando’l xuez Félix Goyache, responsable del programa de meyora xenética del Serida, va esaminar a los animales presentaos a concursu en cualisquier de les modalidaes: meyor gocha, meyor berrón, meyor llabasca d’hasta 8 meses, meyor llabascu d’hasta 8 meses, meyor gocha con gochinos y meyor rebañu. El primer premiu en cada modalidá va llevase 150 euros, mentes que’l segundo va recibir 90 y, el terceru, 60. La entrega de gallardones ta prevista pa les 13.30 hores.
 
Hai que destacar que, de 11 a 13.30 hores, les persones que s’averen a la esposición van poder disfrutar de más de 100 quilos de picadillu con tortos de baldre ellaboráu pola Asociación de Muyeres So la Malena. Amás tamién va celebrase’l I Concursu de Picadillu de Gochu Asturcelta, nel que’l xuráu formáu por Juanjo Cima, propietariu del bar Vinoteo, d’Uviéu; David Fernández-Prada, periodista y xerente de Gustatio; Jorge Ignacio Sánchez, direutor de Gastroastur; Miguel Llano, periodista y direutor del suplementu ‘Yantar’ del diariu El Comercio; y Luis Serrano, periodista del programa ‘Conexión Asturias’, de TPA, van decidir cuál ye la meyor propuesta de les presentaes polos ganaderos participantes nel certame.
  
Les persones qu'asistan a esti eventu, amás de disfrutar del picadillu, tamién va poder mercar productos de gochu asturcelta pa llevar a les sos cases, yá que Productos Agroalimentarios Gancedo,de Tinéu, y la carnicería El Rosal, de Grau, van poner un stand nel llugar. Nellos van vendese los primeros xamones ellaboraos de gochu asturcelta.
 
Otra manera, la posibilidá de disfrutar de la carne d’esta raza del país va continuar el domingu cola celebración de la I Folixa de Gochín a la Estaca, nel mesmu recintu ferial del Morcín. La ración tien un preciu de 10 euros y, pa disfrutala, ye necesario reservar con antelación per teléfonu al 985.783.359 (bar El Cruce).
 
Amigos del gochu
 
Aprovechando la celebración de les xornaes, ACGA va entregar los sos gallardones anuales a aquelles persones o entidaes qu’amosaron, d’una manera desinteresada, el so sofitu pa la recuperación de la raza de cerdu autóctona. Nesta ocasión, los premiaos pol coleutivu son Ramón Celorio, restaurador asturiano y responsable gastronómicu del Hotel Pelayo, Rectoral Taramundi y el tren Transcantábricu, ente otros; y al programa ‘Conexión Asturias’.
 
Esti coleutivu ta trabayando dende hai 13 años na recuperación d’esta raza del país que tuvo cerca de la so desapaición a finales de la década de los 90. Los más de 100 ganaderos de l’asociación tienen una producción d’unos 2.500 exemplares, con unes 400 femes reproductores, consiguiendo asina asentar la raza que, sicasí, continúa en peligru de desaniciu.