La conseyera d’Educación quier ver medrar la llingua con “pasos curtios, pero seguros”

Ana Isabel Álvarez González, conseyera d’Educación, señaló nel pieslle de la UABRA que l’empeñu del so equipu va ser ver medrar l’asturianu con “pasos curtios, pero seguros”. Ana Cano reclamó otra vuelta la especialidá de Llingua Asturiana.
 
L’aula magna de la Universidá d’Uviéu foi’l llugar onde se celebró’l pieslle oficial de la Universidá Asturiana de Branu (UABRA) y la entrega de diplomes a los más de cien participantes nesta segunda edición de la iniciativa de l’Academia de la Llingua Asturiana (ALLA) entamada en collaboración cola Universidá y el Conceyu de Cangas del Narcea. Nel actu tuvieron presentes Ana Isabel Álvarez González, conseyera d’Eduación y Universidaes; José Luis Fontaniella, alcalde de Cangas; Ana María Cano, presidenta de l'ALLA; Xosé Antón González Riaño, direutor de la UABRA; y Pablo Manzano, secretariu de los cursos.
 
Cano, na so intervención, destacó “l’afitamientu d’esti gran proyeutu, pol que naguábamos dende hai tiempu, gracies al enfotu de trés instituciones tán significatives p’Asturies como la Universidá, el Conceyu de Cangas y la propia Academia, ensin escaecer l’importante sofitu que siempre tuviemos de la Conseyería d’Educación”. Depués de facer un repasu poles actividaes desendolcaes en Cangas del 1 al 12 d’agostu y resaltar los llogros algamaos pola UABRA, la presidenta de l’ALLA quixo treslladar “a la señora conseyera d’Educación ún de los problemes que más urxentemente precisen de solución. Refiérome a la non reconocencia de la especialidá de Llingua Asturiana al profesoráu qu’imparte esta materia nes distintes estayes de la enseñanza non universitaria”.
 
“Soi sabedora de la sensibilidá de la conseyera d’Educación pa col asturianu en xeneral y pa con esta cuestión en particular, y nun duldamos del enfotu del nuevu Gobiernu nesti tema. Agora toca-y, vuelvo a dicir, tomar les midíes afayaíces pa qu’esti problema se resuelva bien llueu”, continuó Cano, que resaltó que “la solución nun nos abulta difícil, porque fixóse col aranés”. La presidenta de l’ALLA zarró la so intervención señalando que la reconocencia de la especialidá “sedría una amuesa del compromisu de la Conseyería d’Educación y del propiu Gobiernu del Principáu pa con esti país y pa cola so llingua milenaria”.
 
Tres Cano, tomó la pallabra Álvarez González, que nun fixo referencia a la demanda de la presidenta de l’Academia. La conseyera sí destacó que-y prestaba facer la so primer intervención en llingua asturiana dende que garró’l cargu nel aula magna de la Universidá, "un marcu incomparable", y que "seya además pa celebrar l’esitu, otra vegada más, de la Universidá Asturiana de Branu”. Tres eloxar la iniciativa, Álvarez González destacó a les cuatro instituciones que “trabayen en comuña cola intensidá que requier el rigor d’un enfotu tán dignu de ver medrar la llingua asturiana. Y ési será l’empeñu de nós; un trabayu con pasos curtios, pero seguros; con muncho optimismu, con ganes y abondu compromisu”.
 
Pela so parte, Gotor enumberó los avances fechos pola Universidá no que respeuta a l'asturianu y destacó'l so “compromiso cola llingua asturiana siempre dientro del marcu llegal actual”. Mentes, Fontaniella, que fixo’l discursu n’asturianu occidental, apoyó “el trabayu dacuando inciertu en favor de la sobrevivencia de la nuesa llingua”.
 
La conseyera nun quinxo facer declaraciones
 
Tres l’actu celebráu nel aula magna de la Universidá d’Uviéu, y tres ser requerida polos periodistes ehí presentes, Álvarez González nun quinxo responder nenguna entruga y coló ensin facer declaraciones.