L’Audiencia condena a Otegui y Usabiaga a diez años de cárcel por consideralos dirixentes d’ETA

L’ex voceru de Batasuna, Arnaldo Otegui, y l'ex secretariu xeneral del sindicatu LAB, Rafael Díez Usabiaga, foron condenaos esti vienres a diez años de cárcel pola Audiencia Nacional. El tribunal considéralos dirixentes d’ETA.
 
Según informaron fontes xurídiques, Otegui foi condenáu como dirixente d'ETA por tratar de reconstruyir Batasuna al traviés del proyeutu Bateragune. Amás, los maxistraos Ángela Murillo, Teresa Palacios y Juan Francisco Martel, impusieron ocho año de cárcel a Miren Zabaleta; a la ex tesorera del PCTV, Sonia Jacinto; y al ex responsable d'Haika n'Araba, Arkaitz Rodríguez. De la mesma, absuelve a José Luis Moreno, Amaia Esnal y José Manuel Serra, contra los que la Fiscalía retiró l'acusación, al entender qu'a lo llargo de la vista oral nun se pudiera demostrar que formaren parte de Bateragune.
 
L’Audiencia considera acreditáu que los cinco condenaos formaben parte d'un grupu escoyíu dientro de les files de la izquierda abertzale que, “en plena connivencia y siguiendo les directrices superiores d'ETA, na que s'alcontraben integraos, diseñaben una estratexa d'acumulación de fuerces soberanistes”. Bildu refugó güei la decisión del tribunal y llamó a la “movilización social” a traviés del so voceru Oskar Matute.