28 escueles, ensin maestru d’asturianu o gallego-asturiano pola desidia de la Conseyería d'Educación

Col cursu yá entamáu, la Conseyería d’Educación tovía tien por axudicar 24 places d’asturianu y 4 de gallego-asturianu en Primaria. Esta situación dexa a un bon númbero d’escolinos y escolines ensin poder recibir clase de la so llingua materna.
 
Pese a tener fecha la baremación –según la información dada pola Conseyería d’Educación y Universidaes a los sindicatos y a les persones que, a nivel particular, s’interesaron pola situación–, na primer axudicación de vacantes d’interinos pal cursu 2011-2012, realizada’l 1 de setiembre, quedaron ensin dar 28 places d’asturianu en Primaria y dos en Secundaria, y cuatro de gallego-asturiano en Primaria. Una circunstancia preocupante que, sicasí, s’esperaba que se solucionara na segunda axudicación, que tuvo llugar ayeri. Nella, Educación otorgaba les dos places pendientes de Secundaria y cuatro d’asturianu en Primaria, quedando tovía nel aire 24 en Primaria y les cuatro de gallego-asturianu nesti mesmu ciclu educativu.
 
Esta situación dexa a un bon puñáu d’escolinos y escolines ensin la opción de dar clase d’estes materies, al menos, hasta primeros d’ochobre. Les convocatories de personal interín celébrense los martes y les axudicaciones, los xueves, polo que, al tener qu’esperar ente 3 y 5 díes pa les reclamaciones de baremación, fadría imposible la incorporación de los maestros a estes escueles enantes del 3 d’ochobre.
 
“La única esplicación que pue dase a esta situación ye la intención d’Educación d’aforrar perres; d’aforrar el sueldu de setiembre de los maestros”, esplica Xosé Lluis Colodrón, responsable de la Secretaría de Llingua del Sindicatu Unitariu y Autónomu de Trabayadores de la Enseñanza d’Asturies (Suatea). Esta organización lleva tol mes presionando a la conseyería pa qu’igüe esta situación “que dexa a los escolinos y escolines d’estos centros ensin poder recibir clase”, señala Colodrón, que confirma que, nel casu de nun recibir respuesta d’Educación el llunes, el sindicatu va celebrar una reunión na que va plantease la posibilidá de realizar movilizaciones.