La Tertulia Cultural El Garrapiellu va facer esti domingu la Ruta de los Molinos del Ríu Profundu

La Tertulia Cultural El Garrapiellu va andar esti domingu la Ruta de los Molinos del Ríu Profundu, que trescurre per Villaviciosa. Esti percorríu de calter etnográficu foi descubiertu y impulsáu pol etnógrafu Rafa Balbín.
 
Cola celebración d’esta marcha pola Ruta de los Molinos de Ríu Profundu, El Garrapiellu quier llamar l’atención sobre la so situación, yá que tres la muerte de Balbín, miembru de la tertulia cultural y el so gran impulsor –asoleyó una guía andariega nel 1997 baxo’l nome de ‘Los molinos del Profundu’, editada por VTP, imprescindible pa facer el percorríu y entender la so importancia patrimonial–,  ta cayendo nel escaezu, “polo que ye importante revitalizala y pidir al Ayuntamientu de Villaviciosa que la cuide”. La ruta, que naz en Valbucar y termina en Buslaz, tien 9 quilómetros de llargor y permite contemplar 22 molinos “en bastante mal estáu, pero que dan idea de lo importante que foi en toda Asturies la ‘cultura’l pan’ como elementu de comunicación ente los pueblos, porque foron bastantes los caminos y siendes que s’abríen pa dir a moler; a la vez, tamién desendolcaron la cultura inmaterial: son munchos los cantares, lleendes y tradiciones qu’inda tán na memoria de los pueblos”, señalen dende El Garrapiellu.
 
Los miembros de la tertulia cultural van salir a les 10.30 hores del domingu del Café de Vicente, en Villaviciosa. Los teléfonos de contautu pa los interesaos en conocer les maravilles que guarda esta ruta son el 629.776.935 y el 606.390.344.