La Coordinadora espera que les bateríes de coque nueves d’Arcelor en Xixón traigan ameyoramientos

L’acondicionamientu de les bateríes de coque de la fábrica d’Arcelor-Mittal en Xixón son una bona noticia pa la Coordinadora Ecoloxista. Esti coleutivu espera qu’esta obra traiga ameyoramientos nel aspeutu medioambiental.
 
Pa ello, la Coordinadora Ecoloxista d'Asturies ta acabante de presentar alegaciones con motivu del trámite de suxerencies del proyeutu d’acondicionamientu ambiental y productivu de les bateríes de coque xixoneses. “Allegrámonos de que por fin la empresa acometiera la tramitación d’unes bateríes nueves de coque na factoría d’Arcelor de Xixón en vista de les deficiencies graves que presenten les actuales, con un funcionamientu que denunciáramos en delles ocasiones  pola so contaminación elevada del aire, del agua y del suelu”, señalen dende’l coleutivu ecoloxista.
 
Según espliquen, la antigüedad de la instalación provoca una gran cantidá de fugues, amás de ruíos que s’espera que se reduzan coles bateríes de coque nueves. Otres peticiones feches pola Coordinadora son que’l gas actual de coque qu’anguaño se quema, pase a filtrase pa que pueda utilizase como combustible dientro del procesu siderúrxicu de la empresa; l’ameyoramientu de l’almacenamientu de subproductos del procesu de la quema del material; que se depure l’agua de manera completa; y la instalación d’un sistema de xeneradores d’emerxencia pa que, “en caso de caídes por avería o fallu, la instalación tea alimentada na parte de los electrofiltros a fin d’evitar emisiones ensin depurar al aire”.