L’ALLA celebra’l pieslle oficial de la Universidá Asturiana de Branu

L’Aula Magna de la Universidá d’Uviéu va acoyer esti vienres el pieslle oficial de la Universidá Asturiana de Branu (UABRA) y la entrega de certificaos y diplomes a los sos más de 100 participantes. L’actu va principiar a les 19 hores.
 
Les persones encargaes de facer la entrega a los alumnos y alumnes de la UABRA, actividá entamada pola Academia de la Llingua Asturiana (ALLA) en Cangas del Narcea del 1 al 12 d’agostu en collaboración cola Universidá d’Uviéu y el conceyu cangués, van ser la conseyera d’Educación y Universidaes, Ana Isabel Álvarez; el rector de la Universidá d’Uviéu, Vicente Gotor; l’alcalde de Cangas del Narcea, José Luis Fontaniella; y la presidenta de l’ALLA, Ana María Cano. D’esta forma ponse puntu y final a esta edición de la UABRA, iniciativa que vivió la so segunda edición y que podría enanchar la so actuación a lo llargo del tol añu, según anunció’l so direutor, Xosé Antón González Riaño, nuna entrevista concedida a Asturies.com.
 
Esti añu, los cursos que s’impartieron na UABRA foron los clásicos de Llingua Asturiana, l’elemental y l’avanzáu; la primer fase del gaellego-asturiano; y dellos d’ afondamientu cultural y llingüísticu: ‘Capacitación pa la traducción al asturianu’; ‘Coses nueves n’Internet. Aplicaciones personales y educatives’; ‘Xuegos y tradiciones populares asturianes’; ‘Historia d’Asturies: Nueves perspeutives’; y ‘Cursu d’aniciu a la investigación toponímica’. Amás, nes dos selmanes que duró la Universidá de Branu, tamién celebráronse en Cangas conferencies, meses redondes o actuaciones musicales, ente otres actividaes.