Álvarez Menéndez comprometióse cola XPDLLA “al desarrollu positivu y non restrictivu” de la Llei d’Usu

Representantes de la Xunta pola Defensa de la Llingua Asturiana (XPDLL) aconceyaron el miércoles con Alfredo Ignacio Álvarez Menéndez. El direutor de Política Llingüística comprometióse “al desarrollu positivu” de la Llei d’Usu.
 
Esta reunión, celebrada esta mañana na sede de la Conseyería de Cultura y Deporte, forma parte de la ronda d’alcuentros que ta celebrando la organización cívica pa conocer les llinies de trabayu del Gobiernu nuevu y pa esponer les sos propuestes en cuanto a la llingua asturiana. Nesta ocasión, l’alcuentru foi con Álvarez Ménendez, qu’amosó “una actitú reflexiva y positiva al respective de les midíes necesaries pa la normalización y que comprometióse ‘al desarrollu positivu y non restrictivu de la Llei d’Usu y Promoción de la Llingua Asturiana’”, destacó la XPDLL.
 
Carlos Pulgar y Llucía Menéndez, representantes del coleutivu nel aconceyamientu, encargáronse de tresmitir les preocupaciones de la XPDLL en cinco materies concretes: l’usu alministrativu, los servicios de normalización, los medios de comunicación, la toponimia y la enseñanza. En declaraciones a Asturies.com, Pulgar señaló que na reunión sorrayaron la necesidá de “llegar al usu de la tresversalidá de la política llingüística na alministración”, destacando nla necesidá de la “visualización del usu del asturianu ensin que l’idioma tea tematizáu a temes culturales”.
 
No que respeuta a los servicios de normalización, la XPDLLA treslladó a Álvarez Menéndez la so “preocupación pola situación na que s’alcuentren”. “Hai que siguir apostando pola estabilidá de los que tán activos anguaño y tomar les aiciones necesaries pa recuperar aquellos que tán pesllaos, que son cuatro: Siero, Piloña, Mieres y Corvera”, señaló Pulgar, que tamién considera fundamental “poner a funcionar de manera efeutiva y real la Rede, una ferramienta clave pa la optimización de los recursos y pa poder llegar a la cantidá mayor de xente posible”.
 
Sobre la presencia del asturianu nos medios de comunicación, Pulgar y Menéndez centráronse nel ente públicu. Asina, llamentáronse de “la presencia marxinal” del idioma na RTPA, que cifraron nun 2 por cientu, “a veces menos”. “Ye una cosa qu’hai que cambiar porque los medios de comunicación son una plataforma perimportante pa la normalización de llingua asturiana”, destacó’l voceru de la XPDLLA, que reclama la presencia del idioma en trés bloques que considera claves: “los programas infantiles, los informativos y les retransmisiones deportives”. No que respeuta a la toponimia, amosaron el so esmoleicimientu pol so incumplimientu, “no escrito y no oral”, nel ente públicu y reclamaron l’usu vehicular del idioma nél.
 
D’igual forma, señalaron a Álvarez Menéndez la necesidá de cumplir y siguir ampliando los decretos toponímicos y “establecer les conversaciones necesaries coles instituciones estatales” pa que se cumplan tamién a nivel del Estáu. Por último, nel tema de la enseñanza, tema que Pulgar y Menéndez trataron fondamente cola conseyera d’Educación y Universidaes, Ana Isabel Álvarez González, el 23 d’agostu, treslladaron al direutor de Política Llingüística la preocupación de la organización “pola situación, tristemente repetida tolos empiezos de cursu, na que la falta de dilixencia na axudicación y cobertura de places afecta gravemente al alumnáu, torgándo-y el so derechu básicu al estudiu. Esta cuestión dexa a les clares tanto la necesidá de regularizar y normalizar les condiciones del profesoráu como d’afitar la presencia efectiva del idioma en tolos niveles del sistema educativu”.
 
Intervención próxima de Vallaure na Xunta Xeneral
 
Nun comunicáu asoleyáu tres la reunión, la XPDLLA aseguró que’l coleutivu “va tar sollerte a la definición y cumplimientu del plan de trabayu del Gobiernu asturianu en materia llingüística”. Sicasí, la organización considera'l desenvolvimientu de les midíes anunciaes dientro del marcu actual “como un reblagu previu a la tutela efeutiva de los derechos llingüísticos de la ciudadanía que namás va poder garantizase cola oficialidá de la llingua asturiana”.
 
Otra manera, na selmana qu’entra’l conseyeru Emilio Marcos Vallaure va esponer nuna comparecencia na Xunta Xeneral les llinies de trabayu en materia de política llingüística que va siguir la Conseyería de Cultura y Deporte.
 
Na semeya, Llucía Menéndez y Carlos Pulgar enantes d'entrar al aconceyamientu.