El Congresu apoya’l modelu llingüísticu catalán nes escueles

Toles formaciones con representación nel Congresu, a esceición del PP y d’UPyD, apoyaron una moción presentada por ERC que respalda’l modelu llingüísticu catalán. La votación vien precedida pola decisión del TSX de Catalunya.
 
L’órganu xurisdicional catalán sentenció recién que’l castellanu tenía que ser llingua vehicular na escuela xunto al catalán, decisión que refugó dafechu la Generalitat. La moción aprobada ayeri nel Congresu afala al Gobiernu estatal a defender la inmersión llingüística en Catalunya “como garantía de cohesión social y de la plena igualdá d'oportunidaes, lo mesmo que de la plena competencia llingüística y aprovechamientu escolar de tol alumnáu, tanto en catalán como en castellanu, a nivel oral y escritu, a lo último de la etapa educativa obligatoria (ESO), como demuestren los estudios comparativos qu'evalúen la calidá del sistema educativu catalán”. Nel testu de la enmienda, los grupos parllamentarios apoyaron igualmente “el derechu a recibir la educación en catalán, acordies colo que dispón l'Estatut de Cataluña y les lleis, y a que s'utilice de manera normal el catalán como llingua vehicular y d'aprendizaxe”.
 
El testu manifiesta’l derechu del alumnáu catalán a que nun lu segreguen en centros nin en grupos distintos por razón de la so llingua habitual, acordies col modelu de conxunción llingüística, y qu’aquellos alumnos que la so llingua habitual sía'l castellanu y que s'incorporen tardíamente al sistema educativu, gocen del derechu a recibir l'apoyu especial si asina lo requieren. De la mesma manera, el documentu pautáu puntualiza que'l derechu a la educación en Catalunya exércese nel marcu que los poderes públicos determinen nos currículos de los distintos niveles, ciclos y graos d'enseñanza, les enseñances mínimes y les árees o materies oxetu d'aprendizaxe, entamando coles mesmes el so desarrollu nos distintos centros docentes acordies cola so realidá sociollingüística.
 
Tamién sorraya que, acordies colo dicho “de manera reiterada” pol Tribunal Constitucional, ye “llexítimu dafechu que'l catalán sía'l centru de gravedá na escuela catalana, ensin esclusión del castellanu, de forma que se garantice'l so conocimientu y usu en Catalunya”.
 
Los diputaos asturianos votaron a favor
 
En rueda de prensa posterior a l’aprobación de la moción, el promotor de la iniciativa y voceru d'ERC nel Congresu, Joan Ridao, señaló que se trata d'un “alcuerdu históricu” porque, na so opinión, lleva l'apoyu “del conxuntu del catalanismu”. Asina, indicó que'l modelu catalán na escuela garantiza la igualdá d'oportunidaes, “perriba de la voluntá d'algunos de dixebrar el país por razón de llingua”.
 
Al so xuiciu, l'actual conflictu d'inmersión llingüística representa una agresión de “primer orde”, amás d'un conflictu onde ta en xuegu una concepción supremacista de la “llingua” y “un intentu innoble” d'atacar la convivencia y la paz social de los catalanes. “Hasta agora foi un modelu d'ésitu compartíu cola Xunión Europea y garantía de que cualquier neñu al términu de la ESO conoz ambes llingües”, destacó.
 
Pela so parte, el voceru del PSOE nel Congresu, José Antonio Alonso, recordó la “posición tradicional” del partíu sobre un sistema d'inmersión llingüística que ta demostrando que funciona y que produz la igualdá ente'l castellán y el catalán. Sicasí, puntualizó que “les midíes xudiciales tienen que cumplise y ye un mandatu de la Constitución”. Otra manera, hai que destacar que los cuatro diputaos asturianos del PSOE nel Congresu –Mariví Monteserín, Hugo Morán, Álvaro Cuesta y Celestino Suárez– votaron a favor de la moción d’ERC.