La Coordinadora denuncia la presencia d’otru basureru illegal

La Coordinadora Ecoloxista d’Asturies denunció ante la Fiscalía de Mediu Ambiente y otros organismos la esistencia d’otru basureru illegal nel país. Ésti ta en Quintueles y acueye los residuos de construcción d’una empresa de contenedores.
 
En concreto, el coleutivo ecoloxista tramitó la denuncia ante la Fiscalía de Mediu Ambiente, la Conseyería d’Agroganadería y Recursos Autóctonos, la Conseyería de Fomentu, Ordenación del Territoriu y Mediu Ambiente, y la Confederación Hidrográfica del Cantábricu, tres decatase de la esistencia d’esti basureru incontroláu illegal de Quintueles, nel conceyu de Villaviciosa. Según confirmen dende la Coordinadora, ente los materiales presentes nel llugar hai residuos peligrosos que podríen afectar a les agües del ríu Boñaque, cercanu al llugar, que ye afluente del Ñora.
 
“N’Asturies tenemos cientos de basureros incontrolaos nes zonas rurales onde s’acumulen restos de materiales de la construcción, electrodomésticos y muebles, polo que resulta necesario que los ayuntamientos refuercen polítiques de control d’éstos y que se tomen midíes pa facilitar una xestión bona d’estos residuos diferentes a los domésticos –contenedores d’escombros, recoyida de muebles, etc.– hasta acabar con esti problema ambiental importante” presente en tol país, señalen los ecoloxistes, que recuerden que la creación d’estos basureros pue tipificase como delitu penal d’alcuerdu al artículu 328 del Código Penal que contempla penes de cinco a siete meses de prisión. “Esperemos qu’una vegada que les autoridaes notifiquen la esistencia d’estos residuos illegales al Conceyu de Villaviciosa, se proceda a tomar medíes preventives pa que nun se siga echando basoria nél y que se clausure de manera definitiva”, reclama la Coordinadora.