La Mancomunidá de la Sidra ufre visites guiaes pa presenciar los berros de los venaos na sierra de Peñamayor

La Fundación de Turismu de la Mancomunidá de la Sidra y el Conceyu de Nava, en collaboración cola Agrupación de Cazadores de Nava, ufren visites guiaes pa presenciar en Peñamayor los berros de los venaos. L’actividá ye de baldre.
 
Esti ye’l cuartu añu que s’entama esta actividá qu’atrae a cientos de visitantes a la sierra de Peñamayor a finales de setiembre cuando, cola llegada de la seronda, los venaos pónense en celu y los machos llamen a les femes col esi berru tan carauterísticu. Una esperiencia prestosa que tamién tien como aliciente’l paisaxe espectacular de la zona y l’acompañamientu de cazadores que van facer de guíes.
 
Estes visites a la sierra van celebrase ente los díes 22 y 24 de setiembre, y ente’l 29 y 1 d’ochobre, con salida dende Nava. Toes son de carauter gratuitu, anque los interesaos han de llamar al teléfonu 985.71.74.77 p’acutar plaza pa poder presenciar esti espectáculu natural.