García de la Cuesta va recibir el premiu ‘Pegoyu Asturianu’

L’etnógrafu y folclorista xixonés Daniel García de la Cuesta va recibir esti sábadu'l ‘Pegoyu Asturianu’, premiu que concede’l programa de promoción cultural ‘Luces de ciudad’. Na gala va actuar xunto coles sos bandes Zapica y De Mandilín.
 
El ‘Pegoyu Asturianu’ ye un reconocimientu d’esti programa cultural entamáu pol diariu xixonés El Comercio y la so televisión llocal, Canal 10, pa reconocer a “persones y coleutivos que dexen buelga, que consagren a la solidaridá lo meyor d’ellos mesmos: xenerosidá, humanidá y entrega, que-yos faen ser referentes d’una cultura popular, saludable y participativa”. Nesta ocasión, l’escoyíu pa recibir esti gallardón ye García de la Cuesta, músicu con más de 25 años d’esperiencia que fora componente de bandes como Lliberdón y Beleño y qu’anguaño sigue ufriendo la so música dende Zapica y De Mandilín.
 
La gala d’entrega del premiu va tener llugar el sábadu, a partir de les 19 hores, nel salón d’actos del Centru Municipal Integráu Atenéu de La Calzada, eventu que van presentar Susana y Melisa Mieres baxo la direición de Gonzalo Mieres. Nél van actuar Mari Luz Cristóbal Caunedo, Horacio Huerta y el Grupu Folclóricu Blimea, amás de Zapica y De Mandilín. Mentes, el poeta Antonio Merayo va lleer un testimoniu sobre l’homenaxeáu. La entrada pa presenciar la gala ye llibre hasta completar aforu.