SUATEA denuncia que l'alministración entá “nun sabe qué facer” coles places de docentes d’asturianu

El sindicatu SUATEA asistió a la segunda y última reunión de la Mesa Xeneral de la Función Pública na “que se negociaben supuestamente les plantiyes docentes”. Según señala nun comunicáu “sigue ensin sabese munches cuestiones relevantes, como qué se piensa facer coles places de Llingua Asturiana” por cuenta que “la pregunta de SUATEA, únicu sindicatu que s'interesó por esti asuntu, quedó ensin respuesta”.

SUATEA conseña que “una vez más l’alministración del Principáu d’Asturies abordó ún de los asuntos más trescendentales pa la educación, como son les plantiyes, ensin el concursu de los representantes llexítimos del profesoráu y nun contestu d’imposición, ensin la menor intención de negociar por mor que la documentación unviada a los sindicatos foi incompleta y tardía, tal y como denunciaron tolos sindicatos presentes”.

Según el sindicatu educativu “esti fechu asocede nun añu históricu pal profesoráu asturianu, pues la importantísima sentencia ganada finalmente por SUATEA nel Tribunal Supremo obliga al Principáu a anular les llamaes 'plantiyes funcionales' que yeren l’instrumentu perfectu pa precarizar y amenorgar les plantiyes de los centros públicos d’enseñanza”.

SUATEA denuncia que “desgraciadamente, la única interlocución qu’atiende la Conseyería d’Alministraciones Públiques ye la de los tribunales de xusticia, y sólo por ella vióse obligada a incrementar en 465 places les plantiyes orgániques, cifra notable pero insuficiente pues, teniendo como referencia les antigües plantiyes funcionales sigue quedando centenares de places nel limbu de los xustos, lo qu’abulta como un claru intentu de recortar les plantiyes".

Asimesmo conseñen que’l “Principáu aprovecha la imposición xudicial p’afondar nuna reconversión encubierta; Queda ensin definir la situación de cientos de existentes nes anteriores plantiyes funcionales; Sicasí 465 places, enantes en precariu, pasen a ser estables al incluyíse nes plantiyes orgániques, gracies a la sentencia ganada por SUATEA”

Por too ello dende SUATEA desixen “la inmediata convocatoria de la Mesa Sectorial d’Eduación, única acreditada y representante llexítima del profesoráu asturianu, a fin de que se negocien los aspectos más fundamentales qu’afecten a les nueses condiciones llaborales” y que pasen “a ser plantiya orgánica toles places realmente existentes y pare la reconversión de la función pública docente”.