El FIG vive una nueche especial cola actuación de la banda llocal y la presencia de Llan de Cubel

El Festival Internacional de la Gaita (FIG), qu’entama la Banda Gaites Villaviciosa, vive esti vienres una nueche especial. Va celebrase un conciertu conmemorativo del 25 aniversariu de la banda llocal cola presencia de Corquiéu y Llan de Cubel.
 
La segunda nueche folk del FIG ye la más esperada d’esti festival maliayu nel que se celebra’l 25 aniversariu de la Banda Gaites Villaviciosa-El Gaitero. Ésta va principiar a les 21 hores cola actuación de Fred Morrison, pa depués dar pasu a un conciertu de la banda llocal nel que van collaborar los músicos Jorge Ibañez (bouzuki), Pablo Valdés (guitarra acústica), Daniel Bass (baxu llétricu), Juan Bertrán (guitarra llétrica), Oresten Barbachán (batería y percusiones), Rubén Mol (batería), Héctor Braga (violín, voz y zanfona) y Dani Álvarez (flautes). Completen el cartel d’esta nueche folk los rioseyanos Corquiéu y Llan de Cubel, que va ufrir el so tercer conciertu d’esti añu, l’únicu n’Asturies, tres visitar Occitània y Breizh.
 
Otres actividaes previstes pa güei dientro del programa del FIG son les actuaciones de cantantes de tonada pelos chigres de Villaviciosa, de 13 a 15 hores, amás de la presencia en delles places de la población, a les 18 hores, de la Banda Gaitas Castro Bergidum (El Bierzu), La Reina del Truébano (Navia) y Eprojen Huken (Eslovaquia). Amás, los visitantes tamién van poder disfrutar del Mercadín Tradicional que va tar instaláu en Villaviciosa hasta’l domingu, anque’l FIG va allargase hasta’l llunes, cuando ta prevista la tercer nueche folk cola Bandina la Curuxa y Duerna.